Sunjay Kapur, 53 ára indverskur auðmaður og stjórnandi alþjóðlega bílavarahlutarisans Sona Comstar, lést skyndilega eftir að hafa gleypt býflugu á pólimóti í Englandi. Samkvæmt fyrstu fregnum fékk hann banvænt ofnæmisviðbragð sem leiddi til hjartaáfalls.
Kapur var vel þekktur í pólóheiminum, bæði á Indlandi og í Bretlandi og talinn nánasti vinur Vilhjálms Bretaprins. Hann lék reglulega í einkareknum mótum á konunglegum pólóvöllum á sumrin og var á meðal háttsettra einstaklinga í aðalsmannasamfélagi Bretlands.
Hann fékk býflugustungu í munninn á meðan hann lék, og er talið að það hafi valdið snöggu og alvarlegu ofnæmisviðbragði. Læknar segja að stunga í kok eða öndunarveg geti valdið lífshættulegri bólgu, þrengt öndunarveg og leitt til bráðs blóðþrýstingsfalls og hjartastopps, sérstaklega hjá þeim sem eru með ógreint ofnæmi. Endanleg dánarorsök er enn til rannsóknar.
Andlát Kapur kom sem reiðarslag fyrir fjölskyldu og vini. „Hann var fullur lífs, hlæjandi og spaugilegur, svo bara farinn á augabragði,“ sagði heimildarmaður úr pólóhreyfingunni.
Stuttu fyrir dauða sinn birti Kapur samúðarkveðju á samfélagsmiðlinum X vegna flugslyss Air India í Ahmedabad:
„Hræðilegar fréttir af slysinu í Ahmedabad. Hugur minn og bænir eru hjá fjölskyldum hinna látnu. Megi þau finna styrk á þessum erfiða tíma.“
Kapur, sem hlaut menntun við The Doon School á Indlandi og síðar við University of Buckingham og Harvard Business School, var virkur í atvinnulífinu og sat í fjölmörgum áhrifastöðum. Hann var meðal annars forseti samtaka indverskra bílavarahlutaframleiðenda (ACMA) og meðforseti framleiðsluráðs viðskiptaráðs Indlands.
Þrátt fyrir viðskiptaáherslur var Kapur einnig oft í sviðsljósinu fyrir einkalíf sitt. Hann var áður kvæntur Bollywood-stjörnunni Karisma Kapoor og áttu þau tvö börn saman. Hjónabandið endaði með deilum og Karisma sakaði hann meðal annars um að hafa yfirgefið hana með veikburða barn til að leika í pólóleik með Vilhjálmi prins.
Síðar giftist Kapur Priyu Sachdev, fyrrum fyrirsætu og fatahönnuði.
Fyrirtækið Sona Comstar gaf út tilkynningu eftir fráfall hans:
„Við erum harmi slegin vegna skyndilegs fráfalls formanns okkar, Sunjay Kapur. Hann var leiðtogi með framtíðarsýn, innsæi og eldmóð sem mótaði sögu og árangur fyrirtækisins.“
Samstarfsmenn hafa einnig vottað honum virðingu sína. Einn fyrrverandi samstarfsmaður lýsti honum sem „risa í indverskum iðnaði sem var tekinn frá okkur allt of snemma.“
Heimildarmaður nákominn fjölskyldunni sagði:
„Sunjay var við frábæra heilsu. Enginn trúði því sem gerðist. Þetta er átakanleg áminning um hve brothætt lífið er.“
