Conor McGregor réðst á gest á skemmtistað á Ibiza í vikunni og myndband náðist af árásinni.

Í myndbandi sem breski miðilinn The Sun birti virðist McGregor hafa verið að skemmta sér með vinum sínum um klukkan 05:53 að morgni á þriðjudaginn þegar hann hallaði sér niður og talaði við einhvern sem stóð fyrir neðan hann á skemmtistaðnum.

Hvað sem var sagt virðist það ekki hafa fallið vel í kramið hjá hinum 36 ára bardagamanni því hann brást við með því að slá manninn með tveimur vinstri höggum.

Gesturinn missti jafnvægið og féll aftur fyrir sig. Samkvæmt fréttamiðlinum virðist atvikið ekki hafa haft mikil áhrif á kvöld McGregors því honum var leyft að halda áfram að skemmta sér, á meðan fórnarlamb hans var rekið út af staðnum.

Hvorki McGregor né talsmenn hans hafa tjáð sig um atvikið við fjölmiðla.