Rokksveitin DIMMA hefur kynnt nýjan söngvara til leiks og jafnframt sent frá sér sitt fyrsta nýja lag í fimm ár. Nýr söngvari sveitarinnar er Ivan Mendez, sem þreytir frumraun sína með Dimmu í laginu Skarkali!
Í tilkynningu sveitarinnar á samfélagsmiðlum segir að lagið marki nýtt upphaf hjá Dimmu og gefi jafnframt forsmekk að sjöundu breiðskífu hennar. Unnið er að plötunni og stefnt að útgáfu hennar á næsta ári.
Auk Ivans skipa sveitina Skúli Gíslason trommuleikari, Silli Geirdal bassaleikari og Ingó Geirdal gítarleikari.
Mannabreytingarnar koma eftir deilur innan sveitarinnar fyrr á árinu. Stefán Jakobsson, Stebbi Jak, hætti í Dimmu í apríl eftir um 15 ára samstarf.
Brottför hans kom í kjölfar dómsmáls þar sem Stefán var sýknaður af ákæru um líkamsárás. Í kjölfarið skiptust Stefán og fyrrverandi hljómsveitarfélagar hans á yfirlýsingum þar sem ólíkar lýsingar komu fram á samskiptum þeirra og atburðarás undanfarinna ára.
