Rapparinn, grínistinn og skáldið Halldór Halldórsson, sem flestir þekkja undir listamannsnafninu Dóri DNA, rifjaði upp óvenjulegt atvik úr fortíðinni í hlaðvarpsþættinum Betri en flestir. Þar greindi hann frá því að hafa skotið áhrifavaldinn og fyrrverandi fjölmiðlakonuna Eddu Falak í hnakkann með paintballbyssu þegar hún var aðeins fimmtán ára gömul.
Atvikið átti sér stað á paintballvelli þar sem Dóri var staddur ásamt vinahópi sínum. Að sögn Dóra hafði Edda kvartað undan hegðun hópsins á svæðinu og virðist sú kvörtun hafa orðið kveikjan að því sem síðar gerðist.
Dóri lýsti því í þættinum að hann hefði brugðist við með því að skjóta Eddu í hnakkann með paintballbyssunni.
„Maður fór náttúrulega þegar maður var í einhverjum drengjahópum, þegar fimm gaurar gátu ekki hist án þess að vera með bloggsíðu í kringum það. Einu sinni fórum við í eitthvað svona dót og menn voru orðnir svona... þú veist, eins og stjörnuljós af drykkju strax í hádeginu og við mættum þarna á eitthvað paintball dæmi,“ segir Dóri í þættinum.
„Veistu það að hún, manneskjan sem tengist þessari sögu, neitar fyrir að þetta hafi gerst. Þetta gerðist og ég votta fyrir það. Það eru einhverjir unglingar í paintball á sama tíma og við, eitthvað lið sem var bara fimmtán ára at the time. Þau voru eitthvað ósátt „Þeir eru að drekka og þeir eru að reykja“ og voru alltaf að klaga okkur. Það var kominn einhver gaur „hey strákar, þið verðið að muna að þetta eru unglingar“ og svo eru aðallega ein stelpa og einn strákur sem hafa tekið það sér að koma með honum yfir til að skamma okkur. Svo snúa þau sér öll við og labba í burtu og ég skýt svona úr byssunni og skýt stelpuna í hnakkann. Þetta var Edda Falak, fimmtán ára gömul,“ hélt grínistinn áfram en tók fram að hann hafi beðist afsökunar þegar þau kynntust seinna á ævinni.
„Ég ræddi þetta við hana þegar ég hitti hana. Hún mundi eftir því að hafa verið í paintball með einhverjum leiðinlegum gaurum. Þóttist eins og þetta hafi ekki gerst. Veistu hvað? Ég hefði líka eytt þessu úr minninu en ég er búinn að biðjast afsökunar. Ég er ekki stoltur af þessu en kannski er þetta paintball ekkert sniðugt.“
