Vandað og mikið endurnýjað endaraðhús við Draumahæð 8 í Garðabæ hefur verið sett á sölu. Um er að ræða sex herbergja eign sem telur fimm svefnherbergi og er fasteignin verðlögð á 153,9 milljónir króna.

Húsið var reist árið 1993 og er birt heildarstærð þess 150,6 fermetrar, þar af er 23,4 fermetra bílskúr. Efri hæð hússins er að hluta undir súð og er gólfflötur hennar því talinn um 13 til 15 fermetrum stærri en skráð stærð gefur til kynna.

Á neðri hæðinni eru forstofa, herbergi, hol, baðherbergi og rúmgott alrými þar sem eldhús, borðstofa og stofa tengjast saman. Innangengt er þaðan í bílskúrinn. Á efri hæðinni eru fjögur svefnherbergi og annað baðherbergi. Geymsluloft er yfir einu herbergjanna og þaðan er gengið út á svalir sem snúa til suðvesturs.

Húsið stendur á fjölskylduvænum stað í Garðabæ þar sem stutt er í leiksvæði, leikskóla, aðra skóla og matvöruverslun. Þá eru fjölbreyttar gönguleiðir í nágrenninu.