Á Borgarbókasafninu Spönginni stendur nú yfir sýningin Í ljóma liðinna tíma með verkum úkraínsku listakonunnar Dariya Tumanova en þetta kemur fram í tilkynningu frá bókasafninu.

Á sýningunni má meðal annars sjá vatnslitamyndir af fornbílum, en þetta er í fyrsta sinn sem Dariya heldur sýningu hér á landi.

„Það hefur lengi verið draumur minn að halda sýningu á Íslandi og sjá hvernig íslenskir áhorfendur upplifa myndirnar mínar,“ segir Dariya.

Fornbílar eru áberandi í verkunum og segir Dariya þá hafa sérstakt aðdráttarafl.

„Mér finnst hver og einn þessara gömlu bíla hafa sinn eigin svip og sinn eigin persónuleika. Nútímabílar eru vissulega þægilegri en þeir líkjast hver öðrum svo mikið að ég á stundum erfitt með að finna minn eigin bíl á bílastæði,“ segir hún.

Sýningin snýst þó ekki eingöngu um bíla. Með verkunum leitast Dariya einnig við að fjalla um minningar, menningu og tengsl fólks við liðna tíma.

Dariya er frá Úkraínu og hefur um árabil starfað bæði sem myndlistarmaður og myndlistarkennari. Verk hennar hafa áður verið sýnd í Úkraínu, Þýskalandi og á Ítalíu.

Sýningin stendur yfir á Borgarbókasafninu Spönginni til 28. ágúst.