Öryggismyndavélar í Aþenu náðu myndum af manninum sem handtekinn hefur verið vegna dauða breskrar konu þar sem hann er sagður draga ferðatösku með líki hennar um götur grísku höfuðborgarinnar.
Myndskeiðið á að sýna Sharif Ahmadzai, 26 ára, ganga um miðborg Aþenu með stóra svarta ferðatösku. Hann sést klæddur svörtum stuttermabol og stuttbuxum og með bláan bakpoka á bakinu á leið sinni að yfirgefnu húsi í Kypseli-hverfinu að kvöldi 16. júlí.
Samkvæmt lögreglu skildi hann ferðatöskuna, sem innihélt lík hinnar 38 ára gömlu Elisabeth Jane Ross, eftir í yfirgefnu húsinu áður en hann yfirgaf vettvang. Lík hennar fannst tveimur dögum síðar þegar heimilislaus maður gerði lögreglu viðvart.
Ahmadzai hefur verið handtekinn og ákærður fyrir manndráp af ásetningi, rán og vopnalagabrot. Samkvæmt grískum fjölmiðlum hefur hann viðurkennt að hafa flutt lík Ross í ferðatöskunni en neitar því að hafa myrt hana.
„Hann hefur játað að hafa flutt lík hennar í ferðatösku að staðnum. Lögreglan hefur öryggismyndavélar sem sýna það. Hann hefur einnig viðurkennt að hafa tekið út 10.000 evrur úr hraðbönkum með bankakortum hennar. En hann neitar morðinu og lögreglan trúir þeirri skýringu ekki,“ sagði George Kalliakmanis, heiðursforseti samtaka lögreglumanna í Aþenu.
Ahmadzai er af afgönskum uppruna og hefur orðið grískur meistari í hnefaleikum. Hann kom til Grikklands sem flóttamaður árið 2016 og stofnaði síðar hjálparsamtök fyrir flóttafólk í Aþenu ásamt eiginkonu sinni, Alaina Hall. Talið er að þau hafi kynnst Elisabeth í gegnum starf sitt og haft lykla að íbúðinni þar sem hún dvaldi.
Frumniðurstöður réttarmeinafræðinga benda til þess að Ross hafi látist af köfnun, en endanleg dánarorsök liggur ekki fyrir þar sem beðið er niðurstaðna eiturefnarannsókna.
Rannsókn leiddi í ljós að Ross kom til Grikklands í lok júní og hafði dvalið á nokkrum stöðum áður en hún leigði íbúð í Exarchia-hverfinu. Lögregla segir Ahmadzai hafa haft aðgang að íbúðinni með lyklum. Síðast hafði hún samband við vin þremur dögum áður en lík hennar fannst.
Nánustu aðstandendur urðu tortryggnir þegar þeir fengu textaskilaboð sem þeir töldu ekki samræmast ritstíl hennar. Eiginkona Ahmadzai afhenti lögreglu síðar farsíma og 2.550 evrur í reiðufé sem hún taldi hugsanlega tilheyra hinni látnu.
Við yfirheyrslur sagðist Ahmadzai hafa fundið Ross látna á baðherbergi íbúðarinnar og síðan sett líkið í ferðatösku og losað sig við það kvöldið eftir. Lögreglan telur hins vegar að hann hafi síðar viðurkennt að hafa notað síma hennar til að senda skilaboð í hennar nafni til vina og fjölskyldu og tekið út fé af bankareikningum hennar.
Við húsleit á heimili hans 1. ágúst fundust eftirlíking af Glock-skammbyssu og herhnífur, sem varð til þess að hann var einnig ákærður fyrir vopnalagabrot.
Samkvæmt upplýsingum á vefsíðu Ahmadzai var faðir hans, sem var herforingi í Kabúl, skotinn til bana í árás talibana þegar hann var fjögurra ára gamall. Fimm árum síðar var eldri bróðir hans numinn á brott af talibönum og þegar Ahmadzai var 15 ára létust aðrir fjölskyldumeðlimir hans í sjálfsmorðssprengjuárás.
Málið hefur verið sent saksóknara og er búist við að Ahmadzai komi fyrir dómara í Aþenu á miðvikudag.
