Guðmundur Kristjánsson, forstjóri og stærsti eigandi Brims, kemur nýr inn í eigendahóp Morgunblaðsins í kjölfar kaupa Brims á Lýsi hf. Kaupin gengu nýverið í gegn en virði Lýsis í viðskiptunum nam 30 milljörðum króna.
Með kaupunum eignaðist Brim meðal annars 1,27 prósenta hlut í Þórsmörk ehf., móðurfélagi Árvakurs, útgáfufélags Morgunblaðsins. Guðmundur segir í samtali við Heimildina ólíklegt að hluturinn verði seldur.
„Ég hugsa að við tímum ekki að selja þetta,“ segir Guðmundur og bætir við að ekki standi til að auka hlut Brims í félaginu.
Þórsmörk tapaði 346 milljónum króna á síðasta ári og lögðu eigendur félagsins fram 600 milljónir króna í aukið hlutafé. Eigendur Morgunblaðsins, sem margir tengjast sjávarútvegi, hafa fjármagnað taprekstur blaðsins frá því að fjárfestahópur tók við rekstrinum eftir bankahrunið 2008.
