Fögnuður þjóðhátíðardags Íslendinga fór að mestu friðsamlega fram samkvæmt upplýsingum frá lögreglu, þrátt fyrir að nokkur útköll hafi borist yfir daginn vegna umferðarlagabrota, þjófnaðar, fíkniefnamála og annarra atvika.
Lögregla hafði meðal annars afskipti af einstaklingi sem ók rafhlaupahjóli undir áhrifum áfengis og með fíkniefni í fórum sínum. Viðkomandi var kærður vegna málsins. Þá blés ökumaður undir refsimörkum í áfengismæli eftir afskipti lögreglu.
Þrír ökumenn voru handteknir grunaðir um akstur undir áhrifum fíkniefna. Þeir voru látnir lausir að lokinni blóðsýnatöku. Þá var annar ökumaður einnig handtekinn vegna gruns um fíkniefnaakstur eftir umferðaróhapp þar sem slagsmál brutust út milli ökumanna. Sá var sömuleiðis látinn laus eftir blóðsýnatöku. Enn fremur var einn ökumaður til viðbótar handtekinn grunaður um akstur undir áhrifum fíkniefna.
Tilkynnt var um þjófnað í verslun þar sem verðmæti að andvirði tæplega 40 þúsund króna voru tekin. Málið var afgreitt á vettvangi með skýrslutöku. Einnig bárust tilkynningar um ógnandi einstakling í matvöruverslun og grunsamlegar mannaferðir, en enginn fannst þegar lögregla kom á staðinn.
Lögregla sinnti jafnframt útkalli vegna manns sem hafði lagst til hvílu á gangstétt. Maðurinn var vakinn og kvaðst ætla að halda heim á leið. Þá var ökumaður kærður fyrir of hraðan akstur og lögregla rannsakaði árekstur tveggja bifreiða þar sem engin slys urðu á fólki.
Eldur kviknaði í dælubúnaði við bensínstöð og var slökkvilið kallað á vettvang. Tókst að slökkva eldinn fljótt og urðu skemmdir litlar.
Auk þess sinnti lögregla ýmsum minniháttar útköllum, þar á meðal vegna ólöglegs drónaflugs í Hafnarfirði, auk almenns umferðar- og göngueftirlits.
