Elísa Mjöll Sigurðardóttir mag. theol. hefur verið ráðin sem sóknarprestur við Breiðafjarðar og Strandaprestakall.
Biskup Íslands auglýsti nýverið eftir sóknarpresti við prestakallið en valnefnd hefur nú valið Elísu Mjöll Sigurðardóttur til starfans. Guðrún Karls Helgudóttir, biskup Íslands, hefur staðfest ráðninguna.
Á vef Þjóðkirkjunnar segir að Elísa Mjöll sé fædd árið 1998 en hún er fædd og uppalin á Hólmavík og lauk þaðan grunnskólaprófi.
Hún útskrifaðist með stúdentspróf frá Menntaskólanum á Tröllaskaga árið 2020 en sama ár hóf hún nám við Guðfræði- og trúarbragðafræðideild Háskóla Íslands.
Vorið 2025 útskrifaðist Elísa Mjöll með mag.theol próf frá sömu deild.
Fram kemur á vef kirkjunnar að Elísa Mjöll hafi starfað við Hólmavíkurkirkju frá árinu 2021 og verið með sunnudagaskóla og fermingarstarf. Þá er hún einnig slökkviliðsmaður í Brunavörnum Dala, Reykhóla og Stranda.
Þá hefur Elísa Mjöll einnig tekið ýmiskonar námskeið á vegum Björgunarsveitarinnar Dagrenningu á Hólmavík.
Býr hún á Hólmavík ásamt eiginmanni sínum, Berki Vilhjálmssyni og börnunum þeirra tveimur, Ágústi Andra, 10 ára og Ellen Sigurrós, 6 ára.
