Þýskur dómstóll dæmdi á föstudag 81 árs gamlan karlmann í lífstíðarfangelsi fyrir nauðgun og morð á bandarísku ferðakonunni Amy Lopez árið 1994. Málið var óupplýst í þrjá áratugi en framfarir í DNA-rannsóknum urðu að lokum lykillinn að sakfellingunni.

Lopez var 24 ára þegar hún fannst látin nærri hinu sögufræga Ehrenbreitstein-virki við Rín í borginni Koblenz. Börn fundu lík hennar en hún hafði verið stungin, hlotið alvarlega höfuðáverka og bar merki um kyrkingu.

Lögreglu tókst ekki að bera kennsl á árásarmanninn á sínum tíma. Í febrúar á þessu ári var hins vegar tilkynnt um handtöku manns, sem aðeins hefur verið nafngreindur sem Hans S., á hjúkrunarheimili.

DNA-sýni hans hafði áður verið skráð eftir að hann var sakfelldur árið 1999 fyrir tilraun til að nauðga 16 ára stúlku. Þeim erfðaupplýsingum hafði síðar verið eytt en lögregla aflaði nýs munnvatnssýnis frá manninum. Það reyndist passa við DNA-sýni sem fannst á fatnaði Lopez.

Héraðsdómstóllinn í Koblenz komst að þeirri niðurstöðu að Hans S. hefði vísvitandi leitað að fórnarlambi til að nauðga. Hann hefði lokkað Lopez inn á afskekktan stíg undir því yfirskini að ætla að vísa henni leiðina að farfuglaheimili.

Dómstóllinn taldi brotið sérstaklega alvarlegt, sem getur gert manninum erfiðara fyrir að fá reynslulausn síðar meir.