Í nótt átti sér stað fimmta morðið á konu á átta dögum í Danmörku í óvenjulegri bylgju kvennamorða.
Kona á fimmtugsaldri fannst látin snemma að morgni þriðjudags í Tranbjerg J, og hefur 39 ára sambýlismaður hennar verið handtekinn og ákærður fyrir morð.
Þetta kemur fram í tilkynningu frá lögreglunni í Austur-Jótlandi sem Ekstra bladet fjallar um.
Maðurinn, 39 ára að aldri, hringdi sjálfur í lögregluna klukkan 04:53 í nótt og tilkynnti að 50 ára sambýliskona hans væri látin.
Lögregla og sjúkraflutningafólk fóru strax á vettvang, en ekki reyndist unnt að bjarga lífi konunnar. Maðurinn var handtekinn á staðnum.
Lögregla vann enn á vettvangi í morgun, og hefur girt svæðið af til að tryggja sönnunargögn.
Síðar í dag verður hinn 39 ára gamli maður leiddur fyrir dómara í Árósum.
Lögreglan á austurhluta Jótlands greinir frá því að ákæruvaldið muni óska eftir því að réttarhöldin eigi sér stað bakvið lokaðar dyr og að ekki verði veittar frekari upplýsingar að svo stöddu vegna rannsóknarinnar. Aðstandendur konunnar hafa verið upplýstir.
Þetta er í fimmta sinn á átta dögum sem kona er myrt í Danmörku.
Mánudaginn í síðustu viku var 47 ára gömul kona skotin til bana á miðri götu í Brønshøj, norðvestur af miðri Kaupmannahöfn, og var 61 árs gamall fyrrverandi eiginmaður hennar handtekinn og síðar úrskurðaður í gæsluvarðhald, grunaður um morð.
Á þriðjudag fannst 71 árs kona látin á Kingosvej í Esbjerg og benti rannsókn lögreglu fljótt til þess að um refsiverðan verknað væri að ræða.
55 ára og 84 ára gamlir menn voru handteknir og ákærðir fyrir morð. Sá yngri var leiddur fyrir dómara og úrskurðaður í gæsluvarðhald. Hann er grunaður um að hafa banað konunni með því að kæfa hana. Hann neitar sök. Samkvæmt lögreglu þekkti konan mennina tvo.
Sama dag fundust karl og kona á fertugsaldri látin í húsnæði í Nørresundby, norður af Álaborg. Lögregla gaf síðar út að talið væri að maðurinn hefði myrt konuna og síðan svipt sig lífi.
Lögreglan á Norður-Jótlandi staðfesti að þau hefðu áður verið í sambúð.
Danmörk telst til eins öruggasta lands heims. Allt árið 2022 voru tilkynnt 23 morð á konum í landinu.
