Brynn Carnesecca, sem keppti í fegurðarsamkeppni í Utah og var valin vinsælasta stúlkan (e. Miss Congeniality) af keppendum Ungfrú Utah árið 2025, lést 26. júlí, aðeins 21 árs að aldri. Fjölskylda hennar segir að hún hafi fallið fyrir eigin hendi.

Móðir hennar, Michele Carnesecca, sagði við minningarathöfn sem haldin var 28. júlí að hún vildi að dóttur hennar yrði minnst fyrir lífið sem hún lifði, en ekki hvernig því lauk.

„Hún batt enda á eigið líf, en hún er miklu meira en það sem kom fyrir hana,“ sagði Michele. „Hún var einstakur penni og bókaunnandi frá unga aldri.“

Brynn var krýnd Miss American Fork árið 2024 og var valin Miss Congeniality af keppendum Ungfrú Utah árið eftir. Hún hafði einnig áform um að taka þátt í Miss Provo-keppninni sem átti að hefjast síðar í ágúst.

Að sögn móður hennar var Brynn hæfileikarík og glaðlynd en lagði umfram allt áherslu á að hjálpa öðrum.

„Líf hennar snerist um að þjóna öðrum. Hún vann alltaf góðverk í kyrrþey,“ sagði Michele.

Brynn stofnaði meðal annars samtökin Envelopes of Hope, sem tengja saman íbúa og fanga í Utah með bréfaskriftum.

Systir hennar, Cate Carnesecca, minnist Brynn í hjartnæmri færslu á Instagram og segir hana hafa verið sína bestu vinkonu frá fæðingu.

„Við sögðum alltaf: „Við göngum í gegnum þetta líf saman,“ en því miður er það ekki lengur þannig,“ skrifaði hún.

Cate sagði að þær systur hefðu gert áætlanir um framtíðina, meðal annars að búa nálægt hvor annarri og ferðast um heiminn.

Hún sagði jafnframt að margir hefðu ekki áttað sig á þeim erfiðleikum sem Brynn glímdi við.

„Brynn var bjartasta ljósið, en hún átti í djúpri innri baráttu. Fyrir marga kom það sem algjört áfall því hún var ósérhlífnasta manneskja sem ég þekkti og setti alltaf þarfir annarra ofar sínum eigin.“

Að lokum hvatti hún fólk til að draga lærdóm af sögu systur sinnar.

„Látum sögu Brynn vera áminningu um að við vitum aldrei hvað annað fólk er að ganga í gegnum,“ skrifaði hún.