32 ára bresk kona slasaðist eftir að hafa fallið um sjö metra niður af verönd yfirgefinnar byggingar í Puerto del Carmen á spænsku eyjunni Lanzarote en greint er frá málinu í spænskum miðlum.

Atvikið átti sér stað skömmu fyrir miðnætti á sunnudagskvöld á Calle Princesa Guayarmina í Puerto del Carmen, sem er einn vinsælasti ferðamannastaður eyjunnar.

Fjölmennt lið viðbragðsaðila var kallað á vettvang, þar á meðal lögregla og slökkvilið.

Konan hlaut nokkra áverka við fallið. Sjúkraflutningamenn hlúðu að henni á vettvangi og komu henni í stöðugt ástand áður en hægt var að flytja hana í sjúkrabíl.

Björgunaraðgerðir reyndust nokkuð flóknar vegna aðstæðna við bygginguna. Til þess að koma konunni að sjúkrabílnum þurftu viðbragðsaðilar að bera hana yfir um tveggja metra háan vegg og fara með hana í gegnum verönd hjá nágranna.

Að því loknu var konan flutt á sjúkrahús í Arrecife þar sem hún gekkst undir frekari rannsóknir og meðferð vegna áverka sinna.

Ekki liggja fyrir upplýsingar um hversu alvarleg meiðsli hennar eru.

Þá hefur ekki verið greint frá því hvað varð til þess að konan féll af veröndinni eða hvers vegna hún var stödd við yfirgefnu bygginguna þegar slysið varð. Nánari tildrög atviksins hafa því enn ekki verið staðfest.