Finnsk-rússnesk kona hefur verið ákærð í Finnlandi fyrir stórfellt mansal vegna þess að hún er sögð hafa flutt börn sín til Sýrlands á svæði sem þá voru undir stjórn hryðjuverkasamtakanna Íslamska ríkisins.

Ríkissaksóknari Finnlands greindi frá ákærunni á fimmtudag. Konan, sem er á fimmtugsaldri og búsett í Finnlandi, er ákærð fyrir tvö tilvik stórfellds mansals. Málið nær yfir tímabilið frá 2014 til 2024. Konan neitar sök.

Samkvæmt frumrannsókn lögreglu fór konan með börn sín til Sýrlands árið 2014. Fjölskyldan endaði síðar í Al-Hol-flóttamannabúðunum í norðausturhluta Sýrlands, þar sem meðal annars hafa dvalið fjölskyldur einstaklinga sem tengdust Íslamska ríkinu.

Jan Aarnisalo, rannsóknarlögreglumaður sem fór fyrir rannsókn málsins, sagði þegar henni lauk á síðasta ári að börnin hefðu verið látin búa við aðstæður þar sem ekki hefði verið unnt að tryggja rétt þeirra til öruggs uppeldis.

Konan sneri aftur til Finnlands ásamt öðru barninu fyrir árslok 2021. Hitt barnið kom síðar aftur til landsins.

Börnin eru nú bæði orðin fullorðin en ekki hefur verið upplýst um nákvæman aldur þeirra.

Ríkissaksóknari Finnlands hefur nú lagt málið fyrir héraðsdóm þar sem ákærurnar verða teknar til meðferðar.