Fjórar konur saka bandaríska leikarann og tónlistarmanninn Jared Leto um refsiverða kynferðislega háttsemi í nýrri heimildarmynd BBC, Jared Leto: Hollywood's Dark Secret. Konurnar segja meint brot hafa átt sér stað þegar þær voru á unglingsaldri.
Ein kvennanna segir að hún hafi verið 17 ára þegar Leto hafi beitt hana kynferðisofbeldi á baðherbergi mótels. Önnur segir að hann hafi hótað henni kynferðisofbeldi þegar hún var ein með honum á hótelherbergi, 19 ára gömul.
Þriðja konan heldur því fram að hún hafi verið 17 ára þegar hún átti í kynferðissambandi við Leto í Kaliforníu, þar sem lögaldur til kynferðislegra samskipta er 18 ár.
Fjórða konan hélt því fram að Leto hefði tælt hana, og lýsti kynferðislega grófum símtölum hans til hennar þegar hún var 16 ára. Hún segir hann meðal annars hafa lagt til að þau myndu sofa saman. Konan segist einnig hafa verið beðin um að skrifa undir þagnarsamning, en hafi hafnað því.
Alls ræddu tíu konur við BBC vegna heimildarmyndarinnar. Sumar þeirra halda því fram að atvik hafi átt sér stað þegar þær voru aðeins 14 ára gamlar, á tímabilinu 2002 til 2016.
Ein þeirra segir að það hafi tekið hana áratugi að segja sögu sína.
„Þetta gerðist fyrir 25 árum ... og hann hefur komist upp með það,“ segir hún í myndinni.
Tveir menn sem störfuðu með hljómsveit Letos, 30 Seconds to Mars, segja jafnframt að hann hafi stundum boðið unglingsstúlkum baksviðs, í búningsherbergi sitt eða heim til sín þar sem hann vann að tónlist.
„Ég held að öllum hafi fundist aldursmunurinn einfaldlega of mikill,“ segir annar þeirra.
Leto er 54 ára gamall og hefur átt farsælan feril sem bæði tónlistarmaður og leikari. Hann hlaut Óskarsverðlaun sem besti leikari í aukahlutverki árið 2014 fyrir leik sinn í Dallas Buyers Club og er einnig þekktur fyrir hlutverk sitt sem Jókerinn í Suicide Squad.
Árið 2025 vísaði Leto á bug ásökunum um kynferðisbrot eftir að nokkrar konur höfðu stigið fram með sambærilegar frásagnir. Þá greindi Air Mail frá því að níu konur hefðu sakað hann um óviðeigandi hegðun þegar þær voru á unglingsaldri.
Leto hefur ekki verið ákærður fyrir þau brot sem fjallað er um í heimildarmynd BBC.
