Lögreglan á höfuðborgarsvæðinu hafði heldur betur í nógu að snúast frá 17:00 í gær til 05:00 í morgun en samkvæmt dagbók lögreglunnar gista 13 manns í fangageymslum og voru 110 verkefni skráð í kerfi lögreglunnar. Hér fyrir neðan má sjá nokkur dæmi.
Maður var handtekinn fyrir að fara ekki að fyrirmælum lögreglunnar í miðborg Reykjavíkur. Gistir hann nú fangaklefa en lögreglan þurfti ítrekað að hafa afskipti af honum yfir daginn.
Fjórir ökumenn voru handteknir vegna gruns um ölvunar eða fíkniefnaakstur í miðbænum.
Þá voru fjórir einstaklingar handteknir eftir að einstaklingur var rændur í miðborg Reykjavíkur. Tveir af þeim enduðu í fangaklefa en hinir tveir voru undir aldri þannig að barnavernd var kölluð til og mun taka ákvörðun um framhaldið.
Í Kópavogi var maður handtekinn en hann er grunaður í fjölmörgum þjófnaðarmálum úr verslunum og gistir hann nú í fangaklefa.
Í Breiðholtinu barst tilkynning um líkamsárás og voru tveir grunaðir en þó ekki handteknir. Að sögn lögreglunnar er málið í rannsókn.
Lögreglan sem sér um Kópavog og Breiðholt voru með gott umferðareftirlit sem varð til þess að tveir voru handteknir, grunaðir um akstur undir áhrifum fíkniefna. Var þeim báðum sleppt eftir hefðbundið verkferli.
Unglingar á léttum bifhjólum ollu ama í Mosfellsbænum en þegar lögreglan kom á vettvang létu þeir sig hverfa.
Þá barst tilkynning um umferðaróhapp eftir glæfraakstur í Mosfellsbæ en lögreglan fann ökufantinn og fór málið í hefðbundið ferli.
