Flugvél Bandaríkjaforseta, Air Force One, neyddist til að snúa óvænt við til herflugstöðvarinnar Joint Base Andrews skömmu eftir flugtak vegna rafmagnsbilunar, rétt eftir að Donald Trump lagði af stað á World Economic Forum í Davos í Sviss.
Trump var á leið til Davos þegar flugáhöfnin varð vör við „minniháttar rafmagnsvandamál“, eins og staðfest var af talskonu Hvíta hússins, Karoline Leavitt, að því er Express greinir frá.
Í varúðarskyni var ákveðið að snúa við. Blaðamenn um borð urðu varir við að ljós í fjölmiðlarými flugvélarinnar slokknuðu augnablik áður en vélin hélt af stað, þó engin skýring væri gefin á því á þeim tíma.
Um það bil 30 mínútum eftir flugtak var blaðamönnum tilkynnt að vélin myndi snúa til baka. Forsetinn steig síðar um borð í aðra flugvél og hélt ferð sinni til Davos áfram, þar sem búist er við að nærvera hans veki nokkra athygli og deilur. Talið er að hann muni mæta um þremur klukkustundum seinna en áætlað var, vegna bilunarinnar.
Tvær Air Force One-vélar sem nú eru í notkun hafa verið í þjónustu í tæplega 40 ár. Flugvélaframleiðandinn Boeing hefur unnið að þróun nýrra véla til að leysa þær af hólmi, en verkefnið hefur mætt töfum.
Vélarnar eru sérútbúnar til að bregðast við ýmiss konar neyðarástandi, meðal annars með geislavörn og eldflaugavarnakerfum. Þá eru þær búnar háþróuðum fjarskiptabúnaði sem gerir forsetanum kleift að hafa samband við herforingja og gefa skipanir á flugi.
Í fyrra færði konungsfjölskylda Qatar Trump lúxus Boeing 747-8 þotu til að bæta í flota Air Force One. Gjöfin vakti mikla gagnrýni og er nú í breytingum til að uppfylla öryggiskröfur.
Blaðamenn greindu frá því að í kjölfar atviksins á þriðjudagskvöld hafi Leavitt gert grín að stöðunni og sagt við þá um borð að katarska þotan hljómaði „ansi vel“ á þeirri stundu.
Í febrúar 2025 þurfti flugvél bandaríska utanríkisráðherrans, Marco Rubio, að snúa aftur til Washington vegna tæknibilunar á leið til Þýskalands.
