Lögreglu barst tilkynning um yfirstandandi innbrot í apóteki en greint er frá þessu í dagbók lögreglu í nótt og í gærkvöldi. Þegar lögreglumenn komu á vettvang hafði gerandinn yfirgefið staðinn en tilkynnandi fylgdi honum eftir. Maðurinn reyndi að komast undan á bifreið og hófst eftirför lögreglu í kjölfarið.

Samkvæmt upplýsingum frá lögreglu ók maðurinn með hættulegum hætti eftir akbrautum og göngustígum áður en hann stöðvaði bifreiðina á göngustíg í Fossvogi. Þaðan reyndi hann að flýja á fæti en var stöðvaður eftir stuttan eltingarleik og handtekinn. Hann var vistaður í fangaklefa og er málið til rannsóknar.

Lögregla sinnti einnig útkalli vegna tilkynningar um ungmenni sem höfðu klifrað upp á þak byggingar. Rætt var við ungmennin á vettvangi. Þá var brugðist við tilkynningu um slagsmál milli tveggja einstaklinga og var það mál afgreitt á staðnum.

Tveir ökumenn voru handteknir grunaðir um akstur undir áhrifum áfengis og eða fíkniefna. Annar þeirra reyndist bæði ölvaður og undir áhrifum fíkniefna en hinn var grunaður um akstur undir áhrifum fíkniefna. Báðir voru fluttir á lögreglustöð í hefðbundið ferli og látnir lausir að því loknu.

Lögreglu bárust einnig tvær tilkynningar um eldsvoða. Annars vegar kviknaði í bifreið en hins vegar varð eldur laus í íbúð. Enginn var í íbúðinni þegar bruninn varð og urðu einungis minniháttar skemmdir. Slökkvilið reykræsti íbúðina og eru bæði brunamálin til rannsóknar.

Þá varð umferðarslys á stofnbraut þar sem tvær bifreiðar rákust saman. Báðar bifreiðarnar voru óökuhæfar eftir áreksturinn en engin slys urðu á fólki. Fljótlega vaknaði grunur um að ökumenn beggja bifreiða væru í annarlegu ástandi. Þeir voru báðir handteknir og vistaðir í fangaklefa vegna rannsóknar málsins.

Að auki var ökumaður stöðvaður sem reyndist sviptur ökuréttindum. Málið var afgreitt með gerð umferðarskýrslu á vettvangi.