Tveir karlmenn hafa verið handteknir á Tenerife eftir að lögregla fann rúmlega 22 kíló af kókaíni í farangursrými bifreiðar þeirra. Mennirnir komu til hafnarinnar í Santa Cruz með ferju frá Gran Canaria.

Að sögn lögreglunnar voru fíkniefnin í um 20 pakkningum og er áætlað götuvirði þeirra meira en 1,3 milljónir evra, jafnvirði um 183 milljóna íslenskra króna.

Lögreglumenn stöðvuðu bifreiðina skömmu eftir að henni hafði verið ekið frá borði ferjunnar. Fram kemur að hegðun mannanna við eftirlitið hafi vakið grunsemdir lögreglu. Svör þeirra við spurningum lögreglumanna hafi meðal annars verið misvísandi og mótsagnakennd.

Í kjölfarið var ákveðið að leita ítarlega í bifreiðinni. Í farangursrýminu fannst stór taska með fjölmörgum pakkningum sem vafðar voru í brúnt límband. Frumpróf staðfesti að um kókaín væri að ræða.

Alls reyndust pakkningarnar innihalda 22,16 kíló af kókaíni. Þá fundust tæplega fimm þúsund evrur í reiðufé í bifreiðinni.

Mennirnir voru handteknir og færðir fyrir dómara ásamt haldlögðum fíkniefnum og öðrum sönnunargögnum. Dómari hefur úrskurðað þá í gæsluvarðhald á meðan rannsókn málsins heldur áfram.

Lögreglan segir að með aðgerðinni hafi tekist að uppræta umfangsmikið fíkniefnanet.