„Ríkisstjórnin stóð af sér áhlaup sérhagsmuna“ segir þingkonan Ásthildur Lóa Þórsdóttir og bætir við að „eftir lengsta málþóf í sögu Alþingis tókst loksins að ljúka þingstörfum á fyrsta þingi ríkisstjórnarinnar.“
Hún segir að þingið hafi verið óvenju stutt því það „hófst ekki fyrr en í byrjun febrúar og stóð því í rétt rúma fimm mánuði.“
Ásthildur Lóa nefnir að „því er ekki að leyna að meirihlutinn hefði viljað koma mörgum af þeim þjóðþrifamálum sem stjórnarandstaðan stóð í vegi fyrir með fordæmalausu málþófi í gegn“ segir hún og bætir því við að „þau birtast einfaldlega fullbúin þegar þing kemur saman eftir átta vikur.“
Hún segir að þrátt fyrir óbilgirni stjórnarandstöðunnar hafi unnist margir stórir sigrar á vorþinginu:
„Ný lög um breytingar á útreikningi veiðigjalda fela í sér leiðréttingu sem þjóðin hefur kallað eftir í mörg ár og jafnvel áratugi“ og segir hún að samkvæmt þeim miðast auðlindarentan til þjóðarinnar nú við „markaðsvirði afla en ekki verð sem útgerð og fiskvinnsla í eigu sama aðila ákveða sjálfir. Það er stór sigur. Þetta er í fyrsta skipti sem ríkisstjórn hefur sett hagsmuni þjóðarinnar framar sérhagsmunum varðandi nýtgingu auðlinda í eigu hennar.“
Ásthildur Lóa segir það ekki hafa komið á óvart að ein sterkasta „sérhagsmunablokk í landinu lagði allt undir til að koma í veg fyrir þessa leiðréttingu.“
Að mati þingmannsins stóðst ríkisstjórn Flokks fólksins , Viðreisnar og Samfylkingar „áhlaup og rándýra auglýsinga- og óhróðursherferð Samtaka fyrirtækja í sjávarútvegi (SFS) og umboðsmanna þeirra samtaka á Alþingi“ og „stóðst“ einnig „linnulausar árásir þingmanna Sjálfstæðisflokksins, Miðflokksins og Framsóknar sem víluðu ekki fyrir sér að hagræða sannleikanum og reyna að ljúga því að þjóðinni að með lögunum ætlaði ríkisstjórnin að þurrka upp hagnað útgerðarinnar. Ekkert er fjarri lagi. Það er fáheyrt að haldnar séu yfir þrjú þúsund ræður og andsvör í einu máli á Alþingi. Að 160 klukkustundir, fjórar starfsvikur, séu teknar undir eitt mál.“
Ásthildur Lóa segir að stjórnarandstaðan hafi hótað því bæði í ræðum sem og á fundum þar sem reynt var að semja um þinglok að hún myndi ekki hleypa neinu máli ríkisstjórnarinnar í gegn ef ekki yrði fallið frá veiðigjalda frumvarpinu:
„Málum sem varða hag allra Íslendinga og þess vegna var nauðsynlegt að stoppa málæðið með heimild í þingskaparlögum.“
Hún segir að engin önnur ríkisstjórn hafi áður vogað sér að fara fram gegn sérhagsmunum stórútgerðanna og að „fyrri ríkisstjórnir Sjálfstæðisflokks, Framsóknarflokks og nú síðast einnig Vinstri grænna hafa þvert á móti farið í einu og öllu eftir því sem stórútgerðin hefur krafist af þeim. Núverandi ríkisstjórn hefur hins vegar gert slagorð Flokks fólksins að sínu: Fólkið fyrst og svo allt hitt. Þau mál sem stóðu útaf nú á vorþingi bíða tilbúin til framlagningar á haustþingi sem hefst eftir aðeins átta vikur, ásamt fjölmörgum öðrum góðum málum sem hafa verið í undirbúningi í ráðuneytum. Ríkisstjórn er því rétt að byrja og hefur langt í frá gleymt strandveiðisjómönnum og þaðan af síður fötluðu fólki og eldri borgurum.“
Ásthildur Lóa segir að strax í þessari viku verði tryggt að bætt verði í aflaheimildir strandveiðisjómanna og þá sé gert ráð fyrir því í fjármálaáætlun er samþykkt var á Alþingi á mánudag að greiðslur til fatlaðs fólks og ellilífeyrisþega hækki samkvæmt launavísitölu:
„Frumvarp þar að lútandi verður síðan lagt fram strax í haust. Þingmenn stjórnarflokkanna fagna þeim sigurum sem náðust á þessu fyrsta þingi og við höfum og munum standa saman öll sem einn og hlökkum til að mæta til þings á ný. Næg eru verkefnin.
Komment