Héraðsdómur Vesturlands hefur dæmt ónafngreindan karlmann til sjö mánaða óskilorðsbundinnar fangelsisvistar fyrir röð alvarlegra umferðarlagabrota og líkamsárás gegn fyrrverandi sambýliskonu sinni og barnsmóður. Jafnframt var hann sviptur ökurétti ævilangt frá 27. nóvember 2025.
Málið var rekið á grundvelli fjögurra ákæra sem sameinaðar voru til meðferðar fyrir dómi. Karlmaðurinn játaði skýlaust öll brotin við þingfestingu málsins og var það því tekið til dóms án frekari sönnunarfærslu.
Samkvæmt dómnum framdi maðurinn alls tíu umferðarlagabrot á árunum 2024 til 2026. Þar af var hann sjö sinnum staðinn að akstri undir áhrifum áfengis. Vínandamagn í blóði hans mældist í flestum tilvikum mjög hátt, allt frá 1,56 prómillum upp í 2,58 prómill. Í einu tilvikanna ók hann jafnframt sviptur ökurétti.
Auk ölvunarakstrar var hann sakfelldur fyrir ítrekuð hraðakstursbrot. Meðal annars ók hann á 143 km hraða þar sem hámarkshraði var 90 km á klukkustund og einnig á 111 km hraða á svæði þar sem sami hámarkshraði gilti.
Þá var maðurinn sakfelldur fyrir líkamsárás gegn fyrrverandi sambýliskonu sinni og barnsmóður. Samkvæmt ákæru tók hann harkalega í konuna, sló hana í höfuð og andlit, kýldi hana í búk, greip fast um handleggi, úlnliði og ökkla og dró hana fram úr rúmi. Við árásina hlaut hún meðal annars mar, skrámur, bólgur og eymsli á líkama.
Við ákvörðun refsingar leit dómurinn til þess að maðurinn hefði áður hlotið ítrekaðar refsingar fyrir sambærileg umferðarlagabrot, meðal annars ölvunarakstur og akstur sviptur ökurétti. Dómurinn taldi því um að ræða ítrekun sem kallaði á þyngri refsingu.
Til málsbóta var litið til þess að hann játaði brotin skýlaust, hefði leitað sér aðstoðar, væri í sálfræðimeðferð og hefði verið edrú um nokkurt skeið. Þrátt fyrir það taldi dómurinn brotin svo alvarleg og sakaferil hans slíkan að ekki væru efni til að skilorðsbinda fangelsisrefsinguna.
Maðurinn var jafnframt dæmdur til að greiða tæplega 1,4 milljónir króna í sakarkostnað, þar af 494.760 krónur í málsvarnarlaun verjanda síns og 900.392 krónur í annan kostnað vegna rannsóknar málsins.
