Mistur hefur legið yfir sundunum í morgun og mengun vegna gosmóðu frá eldgosi á landinu er nú farin að ná til höfuðborgarsvæðisins. Hækkuð gildi fínasta svifryksins hafa mælst á mælistöðvum í Hvalfirði og Kópavogi, að því er fram kemur í upplýsingum frá Veðurstofu Íslands.

Samkvæmt frétt Reykjavíkurborgar er um er að ræða svonefnda gosmóðu, eða blámóðu (e. volcanic smog), sem verður til þegar gasmengun frá eldgosi, meðal annars brennisteinsdíoxíð (SO₂), hvarfast við raka og súrefni í andrúmslofti með tilstuðlan sólarljóss. Við þessa umbreytingu myndast súlfat (SO₄) og brennisteinssýra, sem valda mengun sem erfitt er að greina með hefðbundnum SO₂-mælum. Hins vegar gefa mælingar á fínasta svifryki til kynna að mengunin sé til staðar.

Gosmóða hefur einkennandi blágráan lit og getur haft áhrif á heilsu fólks, sérstaklega þeirra sem eru viðkvæmir fyrir, s.s. með lungna- eða hjartasjúkdóma og fyrir ung börn. Einkenni eru meðal annars höfuðverkur, slen, erting í augum og hálsi, auk flensueinkenna.

Almennar ráðleggingar eru eftirfarandi:

• Lungna- og hjartasjúklingar haldi lyfjum sínum við höndina.
  
• Forðast skal áreynslu utandyra og halda sig sem mest innandyra.
  
• Halda gluggum lokuðum og slökkva á loftræstikerfum.
  
• Ekki er mælt með því að börn sofi úti í vögnum við þessar aðstæður.
  
• Rykgrímur veita enga vernd gegn gasmengun.
  

Þeir sem vilja fylgjast með þróun loftgæða geta nálgast mælingar á loftgæði.is og spár um gasmengun eru aðgengilegar á veður.is.