Grétar Brynjúlfur Kristjánsson, fyrrverandi framkvæmdastjóri Loftleiða og stjórnarmaður í Flugleiðum og fjölmörgum öðrum fyrirtækjum, lést á Landspítalanum 15. ágúst síðastliðinn, 87 ára að aldri.
Hann fæddist í Reykjavík 15. september 1937 og ólst þar upp. Foreldrar hans voru Kristján Guðlaugsson, hæstaréttarlögmaður og stjórnarformaður Loftleiða, og Bergþóra Brynjúlfsdóttir húsmóðir.
Grétar lauk stúdentsprófi frá MR árið 1957 og lögfræðiprófi frá Háskóla Íslands árið 1963. Síðar hélt hann til náms í alþjóðaflugrétti við McGill University, Institute of Air and Space Law, í Montreal í Kanada. Starfsferill hans hófst hjá Loftleiðum í New York árið 1963. Hann var framkvæmdastjóri Loftleiða á Keflavíkurflugvelli 1965–1973 og aðstoðarforstjóri fyrirtækisins árin 1973–1974. Með stofnun Flugleiða hf. árið 1973 hóf hann þar störf, fyrst sem lögfræðingur og síðar sem yfirmaður flugstöðvarstjórnar, skrifstofustjóri og forstöðumaður Bílaleigu Flugleiða-Hertz.
Á námsárum sínum gegndi hann margvíslegum trúnaðarstörfum. Hann var formaður Ferðaþjónustu stúdenta, sat í Stúdentaráði HÍ, ritstýrði Vöku, var formaður stjórnar Hótel Garðs og einnig formaður Orators, félags laganema.
Grétar átti sæti í fjölmörgum stjórnum fyrirtækja. Hann var stjórnarmaður í Flugleiðum, Flugfélagi Íslands og Loftleiðum í yfir þrjá áratugi, þar af í 28 ár sem varaforseti stjórnar, allt til ársins 2004. Hann sat einnig í stjórnum annarra félaga, m.a. Eimskips og dótturfélaga Flugleiða, og gegndi lengi embætti stjórnarformanns Hvals hf. Þá átti hann sæti í stjórn Arnarflugs og var talinn einn áhrifamesti maður íslensks flugheims, þó hann leitaði sjaldan í sviðsljósið. Auk þess sat hann í stjórnum Granda, Vogunar, Kynnisferða og Sæferða.
Eftirlifandi eiginkona hans er Gerður Gunnarsdóttir myndhöggvari, fædd 1942. Með Þóru Kristínu Jónsdóttur eignaðist hann dótturina Bergþóru Kristínu, f. 1960. Með fyrri eiginkonu sinni, Sigríði Þorsteinsdóttur, átti hann börnin Ágústu Örnu, f. 1964, Kristján Magnús, f. 1966, og Ingu Hrönn, f. 1973. Sonur Gerðar og stjúpsonur Grétars er Gunnar Þ. Johnson, f. 1964. Barnabörnin eru tíu og langafabörnin níu.
