Guðfinna Þórdís Gunnarsdóttir segir í viðtali við VIRK endurhæfingu frá einelti sem hún varð fyrir í grunnskóla. Einelti hafði mikil áhrif á hana og var hún lengi að vinna sig út úr þeirri reynslu.

„Ég er uppalin í Þorlákshöfn til fermingaraldurs en þá fluttum við mamma og systir mín í Árbæ í Reykjavík. Foreldrar mínir skildu þegar ég var ellefu ára. Ég varð líka fyrir smávegis einelti í Árbæjarskóla en þar fékk ég miklu meiri stuðning en í Þorlákshöfn. Þannig var það þá. Á litlum stöðum er að minni hyggju oft meira um einelti en í stærri sveitarfélögum. Það er líka meira um viðeigandi þjónustu þar sem margt fólk býr.“

Guðfinna segist hins vegar hafa farið fyrst inn á Reykjalund í meðferð hjá efnaskipta- og offituteyminu þar. „Ég er búin að vera í megrun síðan ég var ellefu ára gömul, eða kannski fyrst í aðhaldi. Ég er búin að prófa alla kúra sem sögur fara af, svo sem ketó, danska kúrinn, Herbalife og svo framvegis, en ekkert dugði til langframa.

Á Reykjalundi var tekið vel á móti henni og hún gripin þegar þunglyndið og kvíðinn voru í hæstu hæðum. „Ég hafði, áður en ég kom á Reykjalund, verið að vinna með langveika stúlku, hún var heima í þrjár vikur og fór svo í viku frí. En þessar þrjár vikur vann ég alla daga og það var of mikið. Ég var samt ekki verkjuð heldur fyrst og fremst andlega mjög illa stödd.“

Eftir þjónustuna hjá VIRK sótti Guðfinna um 250 störf

„Þegar ég hætti í þjónustunni hjá VIRK hafði ég sótt um 250 störf en fékk ekkert þeirra. Að vísu tvö viðtöl sem leiddu ekki til neins. Þá brá ég á það ráð að fara í fjarbúð, skildi eiginmanninn eftir og flutti á Kirkjubæjarklaustur þar sem vinkona mín býr og fékk þar vinnu í sundlauginni og sem stuðningsfulltrúi á leikskóla, eiginlega hundrað og fjörutíu prósent vinnu.“

Fjarlægðin gerir fjöllin blá þó svo að það hafi vissulega verið mikil viðbrigði að þurfa að flytja í annað bæjarfélag til að fá vinnu.

„Þetta voru mikil viðbrigði en ofboðslega gott, þarna varð ég að halda áfram og vinna með það sem ég hafði tileinkað mér hjá VIRK. Hjónabandið þoldi þetta mjög vel. Bæði gerir fjarlægðin fjöllin blá og svo ber þess að geta að maðurinn minn hefur líka fengið góða þjónustu hjá VIRK og skildi því vel hvað ég var að fara í gegnum. Mamma var líka ofboðslega mikill stuðningur.“