Hamas hefur fagnað sameiginlegri yfirlýsingu nokkurra ríkja eftir fund utanríkisráðherra í Amman í Jórdaníu, þar sem fordæmd var aukin hernaðaruppbygging Ísraels á Gaza.

Í yfirlýsingu Hamas segir að afstaða ríkjanna „undirstriki alvarleika þeirrar stigmögnunar og þeirra brota sem hernámsstjórnin fremur og ógna framtíð alls samkomulagsins.“

Fyrr í dag fordæmdu utanríkisráðherrar Jórdaníu, Sameinuðu arabísku furstadæmanna, Indónesíu, Pakistans, Tyrklands, Sádi-Arabíu, Katar og Egyptalands harðnandi árásir Ísraels á Gaza.

Hamas skoraði á ríkin sem stóðu að yfirlýsingunni, sem og milligönguríki og Bandaríkin, að koma í veg fyrir að Ísrael „grafi undan samkomulaginu með áframhaldandi drápum, hernaðaraðgerðum og því að svíkja þær skuldbindingar sem felast í vopnahléssamkomulaginu.“

Í síðasta mánuði samþykktu Hamas og aðrir palestínskir hópar skjal sem kveður á um áætlun um afvopnun á Gaza. Samkvæmt áætluninni yrði afvopnunin framkvæmd samhliða stigvaxandi brotthvarfi ísraelskra hersveita af svæðinu.