Lögreglan handtók mann í annarlegu ástandi á leikskóla í Grafarholti.

Maðurinn hafði komið inn á leikskólann með „stærðar steikarhníf á sér“.

„Maðurinn ógnaði ekki með hnífnum en sökum ástands var hann vistaður í fangageymslu þar til hægt verður að taka af honum skýrslu,“ segir lögreglan í dagbók sinni.

Af fleiri lögreglumálum dagsins má telja að kona „í annarlegu ástandi“ var handtekin í Breiðholtinu fyrir að „fara ekki að fyrirmælum lögreglu og að sparka í lögreglumann“. Hún endaði í fangaklefa.

Krakkar köstuðu steinum í bíla í hverfi 105, sem nær yfir Hlíðarnar og Tún, að Sæbraut. Málið var „afgreitt með aðkomu barnaverndar,“ segir lögreglan. Í sama hverfi skullu saman rafmagnshlaupahjól og bifreið. Ökumaður rafhjólsins meiddist á fæti og fór lögregla með hann á bráðamóttöku til frekari skoðunar.