Heilbrigðisráðuneytið hefur á undanförnum mánuðum unnið að umfangsmikilli greiningu á geðheilbrigðisþjónustu við börn á öllum þjónustustigum heilbrigðiskerfisins.
Er markmiðið það að skipuleggja umbreytingar með áherslu á að stytta biðtíma, einfalda boðleiðir, auka skilvirkni og bæta þjónustu og er gert ráð fyrir því að hægt verði að kynna fyrsta áfanga fyrirhugaðra breytinga næstkomandi haust.
Eins og kemur fram í stjórnarsáttmálanum leggur ríkisstjórnin mikla áherslu á að stytta biðlista barna, auka einnig aðgengi að geðheilbrigðisþjónustu og fjármagna meðferðarúrræði vegna fíknivanda.
Alma D. Möller heilbrigðisráðherra hefur sett geðheilbrigðisþjónustu við börn í forgang. Hún ákvað að setja af stað vinnu í þeim tilgangi að greina þjónustuferla og núverandi skipulag þjónustunnar, og einnig hvort og hvaða breytingar megi gera til úrbóta í þessum málaflokki.
Kemur fram að í þessari vinnu hefur verið lögð afar rík áhersla á notendasamráð, það er að segja, börn og aðstandendur þeirra, meðal annars til að skilja fjölbreyttar og ólíkar þarfir notenda og sýn þeirra á hvað helst þarf að bæta:
„Það er alveg ljóst að hægt er að einfalda núverandi þjónustukerfi, stytta boðleiðir og auka samstarf milli þjónustuveitenda“ segir Alma og nefnir að það séu „vísbendingar um að í greiningarferlum, til dæmis vegna ADHD megi auka skilvirkni með meiri og markvissari samvinnu þeirra sem að greiningum koma, skýrari verkferlum, nýtingu rafrænna lausna og betra upplýsingaflæði.“
Þá segir Alma að „síðast en ekki síst þurfa notendur vandaða upplýsingagjöf og vegvísun um þjónustukerfið í samræmi við þarfir hvers og eins.“
Segir Alma það jafnframt vera afar mikilvægt að lagfæra og „skýra ferla, áður en, eða samhliða því sem þjónustan er styrkt með auknu fjármagni.“
Hún nefnir einnig að „Geðheilsumiðstöð barna er sú stofnun sem oftast framkvæmir mat vegna gruns um ADHD eða röskun á einhverfurófi“ og þar hefur undanfarið „verið unnið að ýmsum útbótum til að stytta bið eins og kostur er með breytingum á verklagi.“
Alma kynnti sér störf miðstöðvarinnar í mars á þessu ári og tilkynnti þá jafnframt um aukið fjármagn til að fjölga stöðugildum þar og stuðla þannig að styttri bið eftir greiningum.
Hún segir að „þjónusta við börn með fjölþættan vanda hefur lengi verið umfjöllunarefni og ásteytingarsteinn í samskiptum ríkis og sveitarfélaga, bæði hvað varðar fyrirkomulag þjónustunnar og innihald“ en í mars síðastliðnum var „undirritað samkomulag sem felur í sér að ríkið tekur að sér framkvæmd og ber ábyrgð á fjármögnun sérhæfðrar þjónustu við þennan hóp“en þarna er um að ræða „börn með miklar stuðningsþarfir sem þarfnast m.a. tímabundinnar vistunar utan heimilis.“
Kemur fram að í mars síðastliðnum hafi heilbrigðisráðherra útdeilt styrkjum úr Lýðheilsusjóði og voru þá meðal annars veittar 27 milljónir króna í styrki til Foreldrahúss og SÁÁ vegna sálfræðiþjónustu við börn, auk styrkja til fleiri verkefna á sviði forvarna og þjónustu sem snýr að börnum.
Heilbrigðisráðuneytið og mennta- og barnamálaráðuneytið vinna „sameiginlega að ýmsum verkefnum til að bæta þjónustu við börn“ og má þar nefna aðgengi að „heilbrigðisþjónustu fyrir börn sem vistast á Stuðlum og aðgerðir til að sporna við ofbeldi gegn börnum og meðal barna,“ sagði Alma.
