Þjóðarmorðið á Gaza heldur áfram og nú er komið á daginn að meira en 400 manns hafa verið drepin við það að sækja sér og fjölskyldum sínum neyðaraðstoð.
Ísraelsher er að leggja aukna áherslu á árásir á Gaza eftir að vopnahlé náðist við Íran fyrir skemmstu.
Í gær drap Ísraelsher hátt í áttatíu manns á Gaza. Síðustu vikur hafa fleiri en 400 fallið í valinn - verið skotin til bana við úthlutunarstöðvar hjálpargagna.
Æðstu menn í Ísraelsher segjast nú leggja aukna áherslu á árásir á Gaza eftir að vopnahlé náðist við Íran.
Nú er svo komið að á hverjum einasta degi þurfa íbúar Gaza að velja á milli hungursneyðar og því að hætta lífi sínu við það eitt að sækja sér mat.
Thameen Al-Kheetan, sem er talsmaður Samhæfingarmiðstöðvar Sameinuðu þjóðanna í mannúðarmálum (OCHA), segir að „Ísrael verður að hætta að skjóta fólk sem er að sækja sér mat“ en samkvæmt OCHA hefur herinn í Ísrael drepið í það minnsta 410 manns frá því að bandarísku samtökin GHF tóku við dreifingu hjálpargagna, en sú beiðni kom frá ísraelskum stjórnvöldum í lok maí.
Þetta fyrirkomulag er alger hryllingur fyrir fólkið á Gaza og Sameinuðu þjóðirnar gagnrýna fyrirkomulagið mjög harðlega, segja það hreinlega fáránlegt, andstyggilegt og að það minni á hungurleikana.
Þarna þarf fólk að koma sér sjálft á úthlutunarstöðvar, langoftast fótgangandi, afar langa leið fram og til baka, því það eru einungis fjórar úthlutunarstöðvar fyrir tvær milljónir manna.
„Við getum ekki ætlast til að almennir borgarar fari inn á vígvöllinn til að réttlæta að drepa þá þar. Við verðum vitni að slíku æ ofan í æ,“ segir Thameen Al-Kheetan.
Ísraelsk stjórnvöld skilgreina meira en 80 prósent af öllu svæði á Gaza sem hættu- eða átakasvæði. Þau skipa íbúum Gaza að fara þaðan og það sem fyrst eins og orð forsætisráðherra Ísraels endurspegla:
„Við eyðileggjum sífellt fleiri heimili – þau hafa ekkert að hverfa að. Þá verður sjálfgefið að íbúarnir vilji flytja frá Gaza,“ sagði Benjamín Netanyahu forsætisráðherra Ísraels í maí á lokuðum fundi.
Ljóst er núna að markmiðið hjá stjórnvöldum í Ísrael er núna að safna íbúm Gaza saman á einum þremur svæðum og eru þau við Gaza-borg, í flóttamannabúðum um mitt Gaza sem og Al-Mawasi.
