Hildur Björnsdóttir, borgarstjóri Reykjavíkur, rifjar upp erfiðan kafla í lífi sínu í einlægri Facebook-færslu í dag. Þar segir hún frá því að í dag séu liðin tíu ár frá því hún greindist með eitlakrabbamein, aðeins sjö dögum eftir að hún eignaðist dóttur sína.

Hildur segir að læknar hafi fundið 16 sentímetra stórt æxli í miðmæti sem reyndist vera eitlakrabbamein. Greiningin hafi verið mikið áfall en hún hafi strax ákveðið að láta sjúkdóminn ekki skilgreina sig.

„Það var óneitanlega áfall en ég var alltaf ákveðin í að sigrast á meininu – læra af reynslunni en láta hana ekki skilgreina mig,“ skrifar hún.

Hún viðurkennir að þrátt fyrir að hafa almennt verið jákvæð og bjartsýn hafi hún oft fundið fyrir ótta. Sá ótti hafi þó kennt henni mikilvæga lexíu um hversu dýrmætur tíminn sé og hvað skipti raunverulega máli í lífinu.

„Þó ég hafi almennt verið bæði jákvæð og bjartsýn, þá varð ég stundum hrædd og óttaslegin. Í þessum ótta lá þó mikilvægasti lærdómurinn - hvað tíminn sem við eigum er naumur og verðmætur - og hvað það er sem maður raunverulega lifir fyrir.“

Hildur rifjar upp augnablikið þegar hún fékk greininguna á gluggalausu herbergi á bráðamóttökunni 27. júlí 2016 og segist þá aldrei hafa getað ímyndað sér hvernig líf hennar myndi þróast næstu tíu árin.

Hún segir að reynslan hafi orðið til þess að hún hafi ákveðið að lifa lífinu til fulls, takast á við það sem hræðir hana og láta drauma sína rætast án þess að bíða.

„Ekki seinna, heldur strax,“ skrifar hún.

Í lok færslunnar segir Hildur að hún finni mikinn tilgang í hlutverki sínu sem móðir fjögurra barna og borgarstjóri Reykjavíkur. Þá segist hún einnig vera gift „besta manninum“.

„Lífið er núna – og það hefur aldrei verið betra,“ skrifar Hildur að lokum.