Félagar í Hjálparsveit skáta í Reykjavík minnast Einars Ragnars Sigurðssonar í færslu sem félagið setti fyrr í dag á samfélagsmiðla en þar er greint frá því að hann hafi látið lífið eftir stutt veikindi. Einar fæddist árið 1967.

„Einar gekk til liðs við sveitina árið 2008 og var ávallt traustur og duglegur félagi, glaðvær, jákvæður og ávallt til í að leggja hönd á plóg,“ segir í færslunni um Einar. „Hann tók þátt í ótal verkefnum með bros á vör og við munum lengi minnast hans fyrir þann hlýja og gleðilega anda sem hann bar með sér.

Eftir fráfall hans hafa félagar rifjað upp hlýjar minningar – það hversu gaman var að hitta hann, hve glaður hann var og hve mikið gæðablóð. Orð eins og „sómapiltur“, „eðalgæji“ og „fyrirmyndarfélagi“ hafa oft verið nefnd og lýsa honum vel.“

Meðlimir hjálparsveitarinnar eru með sár í hjarta en eru þakklátir að hafa fengið að kynnast og starfa með Einari. Minningar af honum muni lifa með félögum hans um ókomna tíð.

Í færslunni er einnig sagt að útför Einars hafi farið fram síðasta mánudag. Til heiðurs honum stóðu félagar úr sveitinni heiðursvörð – sem tákn þakklætis, virðingar og vináttu.

HSSR vottar fjölskyldu, vinum og ástvinum Einars innilegustu samúðarkveðjur og segir að hugur þeirra sé hjá þeim.