Veiðiferð manns í Arizona endaði með skelfilegum hætti þegar alríkislögreglumaður beitti rafbyssu á hann á meðan hann stóð við bensíndælu, sem varð til þess að það kviknaði í manninum. Atvikið náðist á myndband.
Clarence „Chuck“ Coyl tók sjálfur upp myndskeiðið sem sýnir lögreglumann frá bandarísku fisk- og dýralífsstofnuninni (U.S. Fish and Wildlife Service) beina rafbyssu að honum og krefjast þess að hann sýndi skilríki.
Á myndbandinu spyr Coyl: „Fyrir hvað er verið að handtaka mig?“ Lögreglumaðurinn svarar því til að Coyl hafi ekki farið að fyrirmælum eftir að hafa framið brot.
Coyl spyr þá: „Fyrir minniháttar brot? Misgjörð?“ og byrjar að segja: „Þetta er tíu dollara...“ áður en lögreglumaðurinn skýtur rafbyssunni.
Nokkrum sekúndum síðar fellur sími Coyl til jarðar og eldur blossar upp. Á upptökunni heyrist hann öskra af sársauka.
Samkvæmt Coyl hófst atvikið fyrr um daginn í Havasu National Wildlife Refuge, þar sem hann og vinur hans ætluðu að fara í veiði. Hann segir lögreglumann hafa sakað þá um ólöglega umferð um svæðið og skipað þeim að fara, sem þeir hafi gert. Síðar hafi þeir rekist aftur á sama lögreglumann við bensínstöðina.
Mannréttindalögfræðingurinn Ben Crump birti síðar annað myndband af atvikinu þar sem sjá má lögreglumanninn teygja rafbyssuna í átt að Coyl við pallbíl hans og bensíndæluna. Skömmu síðar kviknar eldur undir bílnum.
Coyl segist ætla að höfða mál vegna atviksins. Hann hlaut fyrsta og annars stigs brunasár auk taugaskemmda í tveimur fingrum. Samkvæmt staðbundnum fjölmiðlum hefur hann ekki verið ákærður fyrir neitt brot vegna málsins.
Bandaríska fisk- og dýralífsstofnunin hefur staðfest að lögreglumaður hennar hafi beitt rafbyssunni en vildi að öðru leyti ekki tjá sig um málið.
