Holland mun ekki taka þátt í Eurovision-söngvakeppninni á næsta ári. Hollenska ríkisútvarpið AVROTROS tilkynnti ákvörðunina á mánudag og segir að keppnin geti ekki lengur talist hlutlaus vegna áhrifa alþjóðlegra átaka, einkum stríðsins á Gaza.
Taco Zimmerman, framkvæmdastjóri AVROTROS, segir alþjóðleg átök í auknum mæli hafa áhrif á Eurovision og grafið undan hlutleysi keppninnar. Hún sé því orðin vettvangur sundrungar.
Mikil ólga hefur verið í kringum Eurovision undanfarin ár vegna þátttöku Ísraels. Holland var meðal fimm ríkja sem sniðgengu keppnina árið 2026 ásamt Íslandi, Spáni, Írlandi og Slóveníu. Áhorfendum fækkaði jafnframt verulega og horfðu 131 milljón á keppnina, 35 milljónum færri en árið áður.
Skipuleggjendur Eurovision tilkynntu fyrr í ágúst breytingar á reglum keppninnar, meðal annars að ríki sem ættu í vopnuðum átökum gætu ekki haldið hana. AVROTROS telur breytingarnar þó ekki nægja til að endurheimta traust á sjálfstæði og hlutleysi keppninnar.
Eurovision verður haldin í Burgas í Búlgaríu 15. maí 2027 eftir sigur búlgörsku söngkonunnar Daru í Vín fyrr á árinu.
Holland hefur tekið þátt í Eurovision frá fyrstu árum keppninnar og unnið fimm sinnum. Síðasti sigur landsins kom árið 2019 þegar Duncan Laurence sigraði með laginu Arcade.
Zimmerman segir ákvörðunina sársaukafulla en að AVROTROS verði að standa vörð um grunngildi sín.
