Í dagbók lögreglu frá klukkan 17:00 í gær til klukkan 05:00 í morgun er það helsta að sex gista í fangageymslu lögreglu. Alls eru 96 mál bókuð í kerfum lögreglu á tímabilinu og er listinn ekki tæmandi. Mikið var um umferðalagabrot þar sem fólk var að keyra undir áhrifum áfengis og fíkniefna.
Lögreglustöð 1 – Austurbær- Miðbær-Vesturbær-Seltjarnarnes:
Tilkynnt var um ölvaðan mann setjast upp í bifreið og gera sig líklegan að aka af stað. Þá kom lögreglan að manni sem svaf ölvunarsvefni í stigahúsi. Eftir afskipti lögreglu gekk maðurinn á brott.
Lögregla hafði afskipti af nokkrum aðilum vegna ölvunar og ósæmilegrar hegðunar í miðborginni. Málin voru ýmist afgreidd á vettvangi eða þannig að viðkomandi var látinn dvelja í fangageymslu.
Lögregla sinnti útkalli vegna slyss á rafhlaupahjóli. Einn hlaut minniháttar áverka eftir slysið. Tvisvar var tilkynnt um samkvæmishávaða í heimahúsum þar sem lögreglan mætti á svæðið og ræddi við þá sem stóðu fyrir samkvæmunum.
Tilkynnt var um innbrot í bifreið og einn ökumaður handtekinn grunaður um akstur undir áhrifum áfengis og fíkniefna.
Lögreglustöð 2 – Hafnarfjörður- Garðabær- Álftanes:
Tilkynnt var um kannabisþef í fjölbýlishúsi.
Þá var ökumaður stöðvaður af lögreglu grunaður um að hafa verið að aka án réttinda. Einnig voru tveir ökumenn handteknir grunaðir um akstur undir áhrifum áfengis eða fíkniefna. Þrír ökumenn stöðvaðir fyrir að aka umfram hámarkshraða, sem var 80km/klst þar sem þeir voru mældir og sex ökumenn grunaðir um að aka án réttinda.
Lögreglustöð 3 – Kópavogur- Breiðholt:
Tveir ökumenn voru handteknir grunaðir um að aka sviptir ökuréttindum og undir áhrifum áfengis og vímuefna. Einn ökumaður var stöðvaður sem ók um á ótryggðu ökutæki.
Lögreglustöð 4 – Grafarvogur- Mosfellsbær- Árbær:
Lögregla sinnti útkalli vegna umferðarslyss þar sem bifreið og bifhjól rákust saman. Annar ökumaðurinn hlaut minniháttar áverka.
Lögregla ók fram á mann sem svaf ölvunarsvefni í bifreið. Hann var vakinn og gekk hann sína leið í kjölfarið.
Tilkynnt um óvelkominn aðila á stigagangi og var honum vísað á brott. Þá var einn ökumaður handtekinn grunaður um akstur undir áhrifum fíkniefna.
Að lokum barst lögreglu tilkynning um hópasöfnun ungmenna sem lögregla fór og kannaði með.
