Héraðsdómur Vesturlands hefur dæmt ónefndan mann í 30 daga skilorðsbundið fangelsi fyrir að hafa hótað konu lífláti með SMS-skilaboðum sem hann sendi á nýársdag árið 2025.

Samkvæmt ákæru lögreglustjórans á Vesturlandi sendi maðurinn skilaboð til konunnar þar sem hann sagði: „þá drep ég þig og þennan hund“. Maðurinn mætti ekki fyrir dóm þegar málið var tekið fyrir.

Við ákvörðun refsingar leit dómurinn meðal annars til þess að hótunin hefði verið til þess fallin að vekja ótta hjá brotaþola um líf sitt og velferð. Fram kom að maðurinn hafði ekki áður hlotið refsingu samkvæmt sakavottorði.

Refsing hans var ákveðin 30 daga fangelsi en fullnustu hennar frestað í tvö ár. Fellur refsingin niður að þeim tíma liðnum haldi hann almennt skilorð.

Auk refsingarinnar var manninum gert að greiða 24.373 krónur í sakarkostnað.