Alvarleg hungursneyð herjar nú á norðurhluta Tígraí-héraðs í Eþíópíu, þar sem íbúar segja niðurskurð alþjóðlegrar mannúðaraðstoðar hafa haft skelfilegar afleiðingar. Í þorpinu Hitsats, nærri landamærum Erítreu, eru íbúar sagðir deyja úr hungri og vannæringu og grafreitir að fyllast hratt.
Nireayo Wubet, 88 ára gamall íbúi þorpsins, segir að hann eyði nú stórum hluta daga sinna í að jarða vini og ættingja. „Það eru ekki átökin sem munu að lokum drepa okkur, heldur hungrið,“ segir hann og bætir við að mannúðaraðstoð sé afar takmörkuð. „Við fáum mjög litla hjálp.“
Hitsats hefur um árabil að mestu reitt sig á aðstoð alþjóðlegra hjálparsamtaka, þar á meðal USAID, sem eitt sinn var stærsti veitandi mannúðaraðstoðar í Eþíópíu. Sú aðstoð hefur dregist verulega saman eftir niðurskurð á bandarískum framlögum í valdatíð Donald Trumps. Samkvæmt hjálparsamtökum, þar á meðal World Food Programme, þurfa allt að 80 prósent íbúa Tígraí á bráðaaðstoð að halda.
Læknar án landamæra segja að niðurskurðurinn hafi sett þegar brothætt heilbrigðiskerfi svæðisins undir enn meira álag. „Niðurskurður styrkja hefur aukið álag á þegar veikburða heilbrigðiskerfi, á sama tíma og mannúðarþörfin er langt umfram það sem hægt er að anna,“ sagði Joshua Eckley, yfirmaður samtakanna í Eþíópíu, í samtali við Al Jazeera.
Abraha Mebrathu, umsjónarmaður ríkisrekins flóttamannabúða fyrir um 1.700 innanlandsflóttamenn í Hitsats, segir að aðstoð berist varla lengur. „Þörfin er yfirþyrmandi og stuðningurinn afar lítill,“ segir hann og bætir við að margir íbúar séu orðnir svo veikburða að þeir séu einfaldlega „að bíða eftir sinni röð til að deyja“.
Eþíópísk stjórnvöld hafna því að hungursneyð sé í gangi og segja að nægilegt fæði berist viðkvæmum hópum. Alþjóðlegar stofnanir eru hins vegar á öndverðu máli. Samkvæmt nýjasta mati Famine Early Warning Systems Network þurfa yfir 15 milljónir Eþíópíubúa á bráðri mataraðstoð að halda, þar sem alþjóðleg mannúðarfjármögnun hefur dregist saman og áhrif margra ára átaka eru enn mjög sýnileg.
Í Hitsats óttast íbúar að staðan versni enn frekar. „Með svo marga sem deyja stöðugt er augljóst að grafreitirnir munu brátt fyllast,“ segir Yonas Hagos, djákni í kirkju við þorpið.
