Það verður farið inn á áhugaverðar slóðir hugans á Borgarbókasafninu Sólheimum miðvikudaginn 23. september þegar Ingibjörg Bernhöft, hjúkrunarfræðingur og dáleiðslukennari, mætir með fræðsluna Kraftur hugans.

Ingibjörg ætlar þar að ræða dáleiðslu og hvernig hægt sé að nýta hana í daglegu lífi til að stuðla að meiri ró, sjálfstrausti og vellíðan.

Dáleiðsla kann að hljóma framandi í eyrum sumra en að sögn Ingibjartar er um að ræða náttúrulegt ástand hugans. Þá slakar fólk á, beinir athyglinni inn á við og fær tækifæri til að vinna með hugsanir, tilfinningar og eigin líðan á dýpri og mildari hátt.

Gestir fá tækifæri til að fræðast nánar um dáleiðslu og spyrja Ingibjörgu spurninga. Það verður þó ekki aðeins talað um dáleiðslu því í lok kvöldsins ætlar hún að bjóða gestum að prófa hana sjálfir.

Þá fer fram hópdáleiðsla þar sem markmiðið er að hjálpa þátttakendum að finna innri ró og efla sjálfstraustið.

Fræðslan fer fram á Borgarbókasafninu Sólheimum miðvikudaginn 23. september frá klukkan 18:30 til 20:00.

Aðgangur er ókeypis og öll eru hjartanlega velkomin.