Um helgina er haldinn 34. leiðtogafundur Arababandalagsins en hann er haldinn í Bagdad, Írak.
Stríðið á Gaza er efst á dagskrá fundarins, samkvæmt embættismönnum í Írak.
Þeir segja að markmið Íraks sé að brúa bilið milli Arabaþjóða og móta sameiginlega afstöðu gagnvart stríðinu á Gaza, auk þess að kalla eftir ábyrgð alþjóðasamfélagsins á þeim hörmungum sem eiga sér stað.
Antonio Guterres, aðalframkvæmdastjóri Sameinuðu þjóðanna, er meðal þátttakenda á fundinum.
Forsætisráðherra Íraks, Mohammed Shia al-Sudani, lýsti því yfir í dag að Írak muni leggja til 40 milljónir dala til enduruppbyggingar á Gaza og í Líbanon.
Al-Sudani greindi frá því á fundinum að Írak styddi stofnun „arabísks sjóðs til að styðja við enduruppbyggingu“ eftir áföll og átök í Miðausturlöndum.
„Írak mun leggja til 20 milljónir dala til enduruppbyggingar Gaza og aðrar 20 milljónir til enduruppbyggingar í Líbanon,“ sagði hann.
Hann bætti við:
„Sýn Íraks um lausn á átökum og kreppum í Miðausturlöndum byggist á því að palestínsku þjóðinni sé tryggður óskertur réttur til frjáls og virðulegrar tilveru á eigin landi.“
Al-Sudani lýsti einnig yfir:
„Þetta þjóðarmorð hefur náð þeirri grimmd og ljótleika að það á sér varla hliðstæðu í átakasögu mannkynsins.“
Hann hafnaði „þvinguðum brottflutningi Palestínumanna“ og kallaði eftir tafarlausum lokum á „fjöldamorðunum í Gasa, árásunum á Vesturbakkann og á hernumdu svæðunum“.
„Við höfum kallað eftir, og köllum enn eftir, alvarlegri og ábyrgri samstöðu Araba til að bjarga Gaza og endurvekja starfsemi UNRWA (flóttamannaaðstoð Sameinuðu þjóðanna),“ sagði hann.
