Ísland, ásamt Danmörku og Svíþjóð, tekur þátt í umfangsmiklu verkefni Mannfjöldasjóðs Sameinuðu þjóðanna (UNFPA) í Úganda sem snýr að kyn- og frjósemisheilbrigði en þetta kemur fram í tilkynningu yfirvalda.

Stuðningur Íslands stendur yfir í þrjú ár og nær til níu héraða. Megnið af framlaginu, sem fellur innan fyrirliggjandi fjárheimilda, verður varið í forvarnir og úrræði gegn fæðingarfistli.

Samningur um þátttöku Íslands í verkefninu Strengthening Adolescents and Youth Empowerment and Rights (SAY+) var undirritaður á skrifstofu UNFPA í Kampala. Hildigunnur Engilbertsdóttir, forstöðumaður sendiráðs Íslands þar í borg, undirritaði samninginn fyrir hönd Íslands. Markmið SAY+ verkefnisins er fyrst og fremst að bæta aðgengi að upplýsingum og þjónustu á sviði kyn- og frjósemisheilbrigðis og réttinda (SRHR), auk þess að efla forvarnir gegn kynbundnu ofbeldi meðal ungs fólks á aldrinum 10–24 ára, þar á meðal í flóttamannabúðum og nærliggjandi samfélögum. Danmörk og Svíþjóð eru einnig stuðningsaðilar verkefnisins, sem verður unnið í nánu samstarfi við stjórnvöld í Úganda.

„Ísland hefur undanfarin ár átt í farsælu samstarfi við UNFPA um forvarnir og aðgerðir gegn fæðingarfistli í Namayingo-héraði og á grunni þess árangurs ætlum við að byggja í SAY+ verkefninu. Það er síðan sérstakt fagnaðarefni að öll norrænu ríkin sem starfrækja sendiráð í Úganda skuli taka höndum saman um þetta mikilvæga málefni sem kyn- og frjósemisheilbrigði er, en Úganda stendur frammi fyrir miklum áskorunum á því sviði á sama tíma og alþjóðleg framlög til málaflokksins hafa farið mjög þverrandi á undanförnum misserum,“ segir Hildigunnur Engilbergsdóttir, forstöðumaður sendiráðs Íslands í Kampala.