Íslensk stjórnvöld hafa gert samstarfssamning við félagasamtökin Go Fund a Girl Child um valdeflingu stúlkna og ungra kvenna í viðkvæmri stöðu í Mangochi, samstarfshéraði Íslands í Malaví en stjórnarráðið greinir frá þessu.
Verkefnið ber heitið Empower to Transform og er markmið þess að skapa umhverfi sem styður við stúlkur og ungar konur í dreifbýli og valdefla svo þær geti orðið virkar í samfélaginu.
Samkvæmt stjórnarráðinu eru samtökin Go Fund a Girl Child feminísk grasrótarsamtök sem voru stofnuð árið 2015 og eru rekin af ungum konum í Mangochi. Samtökin horfa sérstaklega til þess að styðja við stúlkur og ungar konur sem hafa hætt í skóla, orðið fyrir ofbeldi, gifst ungar, orðið mæður ungar eða eru í annars konar viðkvæmri stöðu.
„Samningurinn er auðvitað sérstakt ánægjuefni, enda höfum við séð með okkar eigin augum hvernig þetta samstarf hefur skilað áþreifanlegum árangri fyrir þær stúlkur og ungu konur sem notið hafa stuðnings af þessu mikilvæga verkefni,“ segir Þorgerður Katrín Gunnarsdóttir utanríkisráðherra. „Það gefur mikið að sjá hvernig stuðningur frá Íslandi gefur ungum konum færi á að leiða breytingar til hins betra í sínum nærsamfélögum.“
Samkvæmt stjórnarráðinu fá þátttakendur í verkefninu fjölbreytta fræðslu um kyn- og frjósemisheilbrigði, mannréttindi, jafningjastuðning og lífsleikni, svo sem samskiptafærni, sjálfsöryggi, heilbrigð sambönd, lausn ágreinings og loks fjármálalæsi og viðskiptaþjálfun. Veittir verða styrkir til þátttakenda til að hefja eigin atvinnurekstur, og byggja þannig upp fjárhagslegt öryggi fyrir sig og fjölskyldur sínar, ásamt skólastyrkjum fyrir þær sem vilja hefja aftur nám í skóla.
