Akureyrarklíníkin og Landspítali hafa hafið þátttöku í nýju, umfangsmiklu alþjóðlegu rannsóknaverkefni sem miðar að því að varpa ljósi á líffræðilegar orsakir ME-sjúkdómsins (myalgic encephalomyelitis). Verkefnið er fjármagnað af rannsókna- og nýsköpunaráætlun Evrópusambandsins, Horizon Europe, og markar það mikilvæg tímamót í evrópsku samstarfi um lífvísindarannsóknir á þessu sviði, segir á vef Akureyrarklínkarinnar.
Alvarlegur sjúkdómur sem erfitt er að greina
ME er alvarlegur og langvinnur sjúkdómur sem getur haft mjög hamlandi áhrif á daglega virkni og lífsgæði sjúklinga. Hingað til hefur greining sjúkdómsins eingöngu byggst á klínísku mati sérfræðinga. Þetta fyrirkomulag veldur því oft að langur tími líður uns rétt greining liggur fyrir, sem getur haft alvarlegar afleiðingar fyrir þá sem sýkjast.
Leit að lífmerkjum og markvissri meðferð
Að verkefninu standa vísindamenn, heilbrigðisstarfsfólk og fulltrúar sjúklinga frá meira en tuttugu rannsóknastofnunum í Evrópu og Kanada. Markmið samstarfsins er að auka skilning á líffræðilegum orsökum sjúkdómsins og þróa áreiðanleg lífmerki (e. biomarkers) sem tengjast erfðaþáttum, ónæmiskerfi, efnaskiptum, hormónastarfsemi og æðakerfi. Slík lífmerki munu auðvelda greiningu og leggja grunn að markvissari meðferðarúrræðum og framtíðar lyfjarannsóknum.
Umfangsmikil þátttaka á Íslandi
Verkefnið á Íslandi er leitt af Sigurveigu Þ. Sigurðardóttur, sérfræðingi í ofnæmis- og ónæmislækningum á Landspítalanum, í samstarfi við Friðbjörn Sigurðsson hjá Akureyrarklíníkinni. Stefnt er að því að fá 120 ME-sjúklinga og 30 heilbrigða viðmiðunareinstaklinga hér á landi til þátttöku í rannsókninni.
Raddir sjúklinga hafðar að leiðarljósi
Sérstök áhersla er lögð á virka aðkomu sjúklinga og hagsmunasamtaka þeirra. Reynsla þeirra verður nýtt beint við þróun rannsóknaraðferða, flokkun sjúklingahópa og mótun tillagna sem munu nýtast við stefnumótun í heilbrigðiskerfum framtíðarinnar. Þar sem verkefnið hlaut brautargengi eftir strangt alþjóðlegt fagmatsferli Horizon Europe er ljóst að rannsóknasviðið nýtur aukins vægis innan evrópsks vísindasamstarfs.
