Fjögur íslensk fyrirtæki nýttu sér athugasemdakerfi lögreglunnar á höfuðborgarsvæðinu á Facebook til að auglýsa þjónustu sína í síðustu viku.

Lögreglan hafði skrifaði færslu á föstudaginn þar sem hún minnti ökumenn á að taka nagladekk af bílum sínum og birti með mynd af dekkjaverkstæði.

„Lögreglan á höfuðborgarsvæðinu hvetur ökumenn á bifreiðum búnum nagladekkjum til að huga að dekkjaskiptum. Jafnframt er vakin athygli á því að á sumum dekkjaverkstæðum þarf ekki að panta tíma fyrirfram. Meðfylgjandi mynd var tekin á slíku dekkjaverkstæði í umdæminu í morgun, en borgarinn sem sendi okkur hana sagðist hafa rennt þar við og skipt út nagladekkjunum á mjög stuttum tíma, þ.e. lítil sem engin bið var eftir því að komast að. Viðbúið er að svipað ástand kunni að vera á fleiri dekkjaverkstæðum þar sem ekki þarf að panta tíma fyrir dekkjaskiptin áður en komið er á staðinn,“ skrifaði lögreglan.

Fjögur fyrirtæki sáu sér leik á borði til að auglýsa þjónustu sína í athugasemdakerfinu við færsluna en þau eru: Sólning, Dekkjahöllin, Nesdekk og N1 en öll fyrirtækin bjóða upp á þjónustu þar sem skipt er um dekk fyrir ökumenn.