Íslenska kvikmyndin Ástin sem eftir er (The Love That Remains) er á meðal þeirra sex kvikmynda sem tilnefndar eru til hinna virtu Kvikmyndaverðlauna Norðurlandaráðs árið 2026. Tilnefningarnar voru opinberaðar í dag, en fimm leiknar kvikmyndir og ein heimildarmynd bítast um verðlaunin í ár.
Þetta er í fjórða sinn sem leikstjórinn og handritshöfundurinn Hlynur Pálmason hlýtur tilnefningu til verðlaunanna, og í öll skiptin hefur leiðir hans og framleiðandans Antons Mána Svanssonar borið saman. Athygli vekur að tilnefningar Hlyns hafa komið fyrir hönd tveggja ólíkra Norðurlanda í gegnum tíðina.
Fyrsta tilnefning Hlyns kom árið 2018 fyrir dönsku myndina Vetrarbræður, þar sem Anton Máni var einn framleiðenda. Árið 2019 var Hlynur tilnefndur fyrir íslensku myndina Hvítan, hvítan dag og árið 2022 fyrir Volaða land, sem var framlag Danmerkur. Auk þess var Anton Máni tilnefndur árið 2017 fyrir Hjartastein. Meðframleiðandi Ástarinnar sem eftir er í ár er Katrin Pors.
Sex ólíkar myndir á ferðalagi um Norðurlöndin
Alls eru sex kvikmyndir tilnefndar til verðlaunanna í ár og endurspegla þær breidd norrænnar kvikmyndagerðar:
- Ástin sem eftir er (Ísland) – Leikstjórn og handrit: Hlynur Pálmason.
- Beginnings/ Begyndelser (Danmörk) – Leikstjórn: Jeanette Nordahl.
- Birita (Færeyjar) – Leikstjórn og handrit: Búi Dam.
- A Light That Never Goes Out (Finnland) – Leikstjórn og handrit: Lauri-Matti Parppei.
- Sentimental Value / Affeksjonsverdi (Noregur) – Leikstjórn: Joachim Trier.
- Kevlar Soul / Kevlarsjäl (Svíþjóð) – Leikstjórn: Maria Eriksson-Hecht.
Grænland sendi ekki inn framlag að þessu sinni. Myndirnar verða sýndar á kvikmyndahátíðum víðs vegar um Norðurlönd í ágúst, september og október. Á Íslandi verða þær sýndar í Bíó Paradís í tengslum við Stockfish kvikmynda- og bransahátíðina dagana 13.–18. október.
Verðlaunaféð skiptist jafnt
Opinber tilnefningarathöfn fer fram á Alþjóðlegu kvikmyndahátíðinni í Haugasundi í Noregi á morgun, þriðjudaginn 25. ágúst.
Sigurvegararnir verða svo tilkynntir þann 20. október næstkomandi, ásamt vinningshöfum í flokkum bókmennta, tónlistar og umhverfismála. Verðlaunahafar fá afhenta styttuna „Nordlys“ í lok októbermánaðar.
Kvikmyndaverðlaunin nema 300.000 dönskum krónum (tæpum 6 milljónum íslenskra króna). Verðlaunafénu er skipt jafnt á milli handritshöfunda, leikstjóra og framleiðenda til að undirstrika mikilvægi samstarfs þessara þriggja lykilaðila í kvikmyndalist.
