Tölvuleikjafyrirtækið Solid Clouds tapaði 122,1 milljón króna á fyrri helmingi ársins 2026, samkvæmt tilkynningu til Kauphallarinnar. Tapið er svipað og á sama tímabili í fyrra þegar það nam 127 milljónum króna.
Tekjur af tölvuleiknum Starborne Frontiers námu 36,9 milljónum króna en nettó rekstrartekjur voru tæplega 31 milljón. Rekstrargjöld félagsins námu 149 milljónum, þar af voru afskriftir um 70 milljónir. Rekstrartapið nam því 118 milljónum króna.
Eignir Solid Clouds voru bókfærðar á 1,32 milljarða króna í lok tímabilsins, þar af nam eignfærður þróunarkostnaður 1,19 milljörðum. Handbært fé var 9,8 milljónir en félagið væntir 109 milljóna endurgreiðslu frá Rannís síðar á árinu.
Solid Clouds hefur gripið til umfangsmikilla hagræðingaraðgerða og lækkað fastan kostnað um 50 prósent. Félagið undirbýr nú viðbótarpakkann Alliance Wars og aukna alþjóðlega markaðssetningu.
Hjá félaginu starfa ellefu manns.
