Ívar Bjarki Edduson hefur verið dæmdur í 30 daga óskilorðsbundið fangelsi af Héraðsdómi Reykjavíkur.

Ívar var ákærður fyrir að hafa keyrt bifreið undir ávana- og fíkniefnum þegar lögregla stöðvaði akstur hans í fyrra. Hann neitaði í kjölfarið að hlýða lögreglumönnum um að framvísa ökuskírteini og koma út úr bílnum.

Þetta er í fjórða sinn sem hann er dæmdur fyrir sambærilegt brot en hann var sviptur ökurétti í desember 2022 í fjögur og hálft ár og var því ekki með gild ökuréttindi þegar lögreglan stöðvaði hann í fyrra.

Ívar játaði brot sitt og sagði að hann hefði náð betri tökum á lífi sínu eftir mikla vanlíðan. Hann hafi leitað sér aðstoðar og sé í dag í gefandi starfi.

Ásamt því að vera dæmdur til fangelsisvistar var hann sviptur ökurétti ævilangt. Hann þarf einnig að greiða lögmanni sínum 267.840 krónur og 155.653 krónur í annan sakarkostnað.