Bandaríski stórleikarinn Jason Bateman er staddur hér á landi en hann borðaði kvöldverð á veitingastaðnum Horninu í Reykjavík í gærkvöldi.

Veitingastaðurinn greindi frá heimsókn leikarans á Facebook-síðu sinni í gærkvöldi. Bateman er einn þekktasti sjónvarps- og kvikmyndaleikari Bandaríkjanna og hefur átt farsælan feril sem leikari, leikstjóri og framleiðandi.

Bateman, sem er 57 ára gamall, er líklega þekktastur fyrir hlutverk Michaels Bluth í gamanþáttunum Arrested Development. Þættirnir nutu mikilla vinsælda og hlutu fjölda verðlauna og viðurkenninga.

Á síðari árum hefur Bateman vakið mikla athygli fyrir mun alvarlegra hlutverk í Netflix-þáttunum Ozark. Þar fór hann með hlutverk fjármálaráðgjafans Marty Byrde sem flækist ásamt fjölskyldu sinni inn í umfangsmikla peningaþvættisstarfsemi.

Leikarinn hefur auk þess komið fram í fjölmörgum þekktum kvikmyndum á löngum ferli, meðal annars í Juno, Hancock, Horrible Bosses, Game Night og Air. Þá hefur hann ljáð persónum í teiknimyndum rödd sína, þar á meðal Nick Wilde í Zootopia.