Siðanefnd Blaðamannafélags Íslands hefur vísað frá kæru Ko Ko Latt, stjórnarformanns KK Business Group, vegna umfjöllunar RÚV um skipun hans sem heiðursræðismanns Íslands í Mjanmar. Ástæða frávísunarinnar er að kæran barst eftir að tveggja mánaða kærufrestur var liðinn en greint frá þessu á vef félagsins.

Umfjöllunin sem kærð var birtist í fréttaþættinum „Þetta helst“ 1. apríl síðastliðinn, ranglega er sagt 8. apríl úrskurðinum, og var í umsjón Inga Freys Vilhjálmssonar. Þar var fjallað um skipun Ko Ko Latt sem heiðursræðismanns og meðal annars vísað til ásakana samtakanna Justice for Myanmar.

Ko Ko Latt taldi að ásakanir samtakanna hefðu verið settar fram sem staðreyndir án þess að RÚV hefði haft samband við hann eða gefið honum kost á að koma sjónarmiðum sínum og andsvörum á framfæri.

Í samskiptum sínum við RÚV óskaði hann eftir leiðréttingum og benti jafnframt á að umfjöllunin kynni að varða við ýmis íslensk og alþjóðleg lagaákvæði. Þá kom fram að hann hefði ráðið lögmannsstofu til að gæta hagsmuna sinna.

Kæran barst skrifstofu Blaðamannafélags Íslands 12. júlí. Kæranda var í kjölfarið bent á mögulega vankanta á kærunni með vísan til málsmeðferðarreglna Siðanefndar. Hann svaraði 16. júlí og óskaði eftir því að nefndin úrskurðaði í málinu án þess að hann breytti kærunni.

Siðanefnd fjallaði um málið á fundum 21. og 28. júlí.

Í úrskurðinum kemur fram að kærur þurfi meðal annars að berast innan tveggja mánaða frá birtingu viðkomandi efnis. Þar sem umfjöllunin birtist 8. apríl en kæran barst ekki fyrr en 12. júlí var kærufresturinn liðinn.

Málinu var því vísað frá án efnislegrar umfjöllunar um þær athugasemdir sem Ko Ko Latt hafði gert við fréttaflutning RÚV.