Karlmaður hefur verið ákærður fyrir vörslu fíkniefna eftir að lögregla fann lítið magn af maríhúana við leit á honum í Reykjavík haustið 2024.

Samkvæmt ákæru Lögreglustjórans á höfuðborgarsvæðinu á maðurinn að hafa haft 0,57 grömm af maríhúana í vörslum sínum þegar lögreglumenn framkvæmdu öryggisleit á honum við Gvendargeisla, skammt frá Sæmundarskóla, laugardaginn 12. október 2024.

Málið verður þingfest í Héraðsdómi Reykjavíkur 12. ágúst næstkomandi.

Maðurinn er ákærður fyrir brot gegn lögum um ávana- og fíkniefni. Af hálfu ákæruvaldsins er þess krafist að hann verði dæmdur til refsingar og greiðslu alls sakarkostnaðar.

Jafnframt er þess krafist að þau 0,57 grömm af maríhúana sem hald var lagt á við rannsókn málsins verði gerð upptæk.