Karlmaður um fertugt er alvarlega slasaður eftir að hafa orðið fyrir hnífsstungu á bifreiðastæði við Mjóddina í Reykjavík í gærkvöld.

Tilkynning um málið barst lögreglu klukkan 23.08 og hélt hún þegar á staðinn. Fann þar brotaþola illa á sig kominn.

Karlmaður á þrítugsaldri er grunaður um verknaðinn. Var hann handtekinn nærri vettvangi.

Hinn slasaði var fluttur á slysadeild og er ástand hans alvarlegt, eins og áður sagði.

Rannsókn málsins er á frumstigi og ekki er hægt að veita frekari upplýsingar að svo stöddu.