Kate Winslet segir að hún hafi alvarlegar áhyggjur af því hve mikið fegrunaraðgerðir og megrunarlyf séu orðin útbreidd, og telur að sumir séu ekki að nota þetta til að styrkja sjálfa sig, heldur til að breyta sér í einhvern sem þeir eru ekki.
Leikkonan ræddi málið í löngu viðtali við breska dagblaðið The Times, þar sem hún útskýrði hvers vegna hún hefur aldrei farið í fegrunaraðgerðir og fullyrti að hún hafi aldrei „farið undir hnífinn“.
Winslet segir að það hryggi sig að sjá konur, sem eru nú þegar fallegar, láta gera ýmislegt við sig. Hún segir að það sé óhugnanlegt að sjálfsálit fólks geti byggst svona mikið á útliti.
Hún segir að þetta sé stundum ruglandi: stundum sjái hún leikara á rauða dreglinum sem eru náttúrulega fallegir og hún fái á tilfinninguna að samfélagið sé að breytast til hins betra, en síðan sjái hún hversu margir nota megrunarlyf og verði aftur steinhissa.
„Sumir taka ákvarðanir til að vera þeir sjálfir, aðrir gera allt sem þeir geta til að vera það ekki. Og vita þau yfirhöfuð hvað þau eru að setja í líkamann? Þessi fyrirlitning á eigin heilsu er skelfileg. Þetta pirrar mig meira núna en nokkru sinni fyrr. Það er algjört helvítis kaós þarna úti,“ segir Winslet.
En hún segir að fræga fólkið sem fer í aðgerðir sé í raun aðeins toppurinn á ísjakanum, það sem hún hafi miklu meiri áhyggjur af sé „fólkið sem sparar fyrir botoxinu eða draslinu sem það setur í varirnar“.
Mikið af frægum einstaklingum hafa undanfarið talað opinskátt um þær aðgerðir sem þeir hafa farið í, sumir hafa jafnvel gefið upp nákvæman fjölda millilítra í brjóstastækkunum eða viðurkennt notkun á lyfjum eins og Ozempic.
Kylie Jenner hefur jafnframt játað að hún sjái eftir sumu sem hún lét gera, og segist ætla að hvetja dóttur sína, Stormi, til að fara ekki þessa leið.
Aðrir hafa hins vegar fagnað þessari opnu umfjöllun og telja að hún dragi úr fordómum gagnvart fegrunaraðgerðum og geri umræðuna heilbrigðari.
